Косово во недела го организира вториот круг од локалните избори. Тоа што привлекува внимание, е сличноста на текот на изборниот процес спореден со нашите локални избори, кои пред неколку дена и официјално завршија.
Втор круг се одржува во поголем број општини на Косово, така што, со сите сили се води битка и кампања во различни форми сè со цел да се стекне довербата на граѓаните. Ветувањата на кандидатите ги надминуваат сите реални очекувања на граѓаните, но нели, важно е да звучат и да изгледаат убаво проектите и плановите што можеби никогаш нема ни да започнат. Очигледно е дека општинскиот буџет никако не може да го покрие она што тие го ветуваат, но, интересен е фактот што ако се соберат сите ветени инвестиции и проекти од предизборната кампања, не може се покријат ниту со државниот буџет на Косово, земајќи ги предвид сите финансиски капацитети на земјата. Имено, Косово има околу две милијарди годишен буџет, а кандидатите за градоначалници, севкупно ветуваат нешто повеќе од државниот буџет.
Нам, ова ниту ни е чудно, ниту ни е ново, со оглед на фактот што и предизборните ветувања на нашите кандидати за градоначалници и советници на општините, неретко ги надминуваа реалните можности на локалните самоуправи.
Локалните избори таму, носат и други интересни околности од нивната секојдневна политика.
Таков пример е ситуацијата во која губитниците се наградени! Значителен број на кандидати, кои ниту победија во првиот круг, ниту пак се пласираа во вториот круг, се наградени со „скромни“ позиции – заменици министри! Во една мала неразвиена држава, како што е Косово, верувале или не, досега се именувани дури 60 заменици министри.
Со ветените инвестиции и проекти, како и со продолжувањето на трендот на поставување заменици министри, повеќе отколку потребното, многу веројатно на Косово ќе му се случи банкрот наместо просперитет.
Фари Хисени
