Дневен преглед на најважните настани во Република Македонија (05 јули 2016 година): Македонските универзитети не се во првите 1.000 најдобри во светот || Синдикатот на новинари против државна интервенција во медиумите || МВР апелира смртта на Алмир да не се користи за меѓуетнички тензии || Нападната членка на Левица во Битола || Лажни ветувања на Владата и во Прилеп
Македонските универзитети не се во првите 1.000 најдобри во светот
Проценките се дека македонските универзити уште долго нема да влезат меѓу првите 500 на популарно наречената Шангајска листа. Ги нема ни на втората релевантна листа – Тајмс, каде се наброени 1.000 универзитети. Места за македонските универзитети се предвидени само на најшироката листа – Вебометрикс со 20.000 универзитети. Таму, УКИМ е на 1.196-тото место. Регионалните универзитетски центри се далеку пред македонските. Така, на пример, Белградскиот, Љубљанскиот и Загребскиот универзитет се меѓу првите 500 на Шангајската листа.
Синдикатот на новинари против државна интервенција во медиумите
Синдикатот на новинари и медиумски работници е против секаква државна интервенција во медиумите, а особено против владините реклами кои се алатка за држење на медиумите во вазалски однос, вели Тамара Чаусидис. Новиот Предлог-закон за информативни и рекламни кампањи на јавни институции, според Чаусидис, е порака до провладините медиуми дека Владата нема да ги остави на цедило. „Суштински, ништо нема да се смени, само ќе се легализира ситуцаијата која измината година беше под мораториум. Ниту е објавен, ниту имаше јавна дебата пред Владата да го донесе овој закон“, изјави Чаусидис.
МВР апелира смртта на Алмир да не се користи за меѓуетнички тензии
Министерството за внатрешни работи апелира вакви немили настани, како смртта на четиригодишното дете, да не се користат за предизвикување меѓуетнички тензии. Оттаму информираат дека извршиле увид на местото на настанот, а СВР Куманово веќе поднел кривични пријави против пет лица. На возачот кој намерно го прегази малиот Алмир и неговите родители, му е одреден 30-дневен притвор, а ќе одговара за убиство во обид. За останатите лица е поднесена пријава за насилство.
Нападната членка на Левица во Битола
Битолчанката Ивана Атанасовска (24) студентка на Правниот факулет во Скопје, во еден час по полноќ била изложена на закани и обид за физички напад од двајца маскирани во Битола. Атанасоска, актуелен член на Централниот комитет на Левица, случајот ќе го пријави во битолската полиција, иако вели дека нема верба во државните органи.Таа ги повикува сите млади луѓе со слободарски дух, сите граѓани кои сакаат да живеат во слободна држава, сите борци за правда и поголеми социјални и работнички права, да им се приклучат на протестите и да не подлегнуваат на какви и да е закани и притисоци.
Лажни ветувања на Владата и во Прилеп
Пред две години, тогашниот министер за финансии во Владата на Груевски, Зоран Ставрески во ек на изборната кампања, како носител на листа на владеачката коалиција во Изборната единица број 4, на големи ѕвона најави изградба на експресен пат од Градско за Прилеп во должина од 28 километри. Но, и по две години од овие ветувања, останаа само видео-клиповите на Јутјуб, како фактички потсетник за лажните ветувања на владата на Никола Груевски, на Владата на ВМРО-ДПМНЕ, чии членови се дел од истражните постапки на СЈО поврзани со кривични дела за корупција, криминал…
ЦИВИЛ го објавува овој преглед на настани со цел да придонесе кон објективното информирање за настаните и процесите, но и за настани за кои еден дел од медиумите во Република Македонија не информираат или информираат многу малку. Вашето мислење е важно за нас. Ве молиме, вашите коментари, сугестии, информации, фотографии и видео прилози испраќајте ги на нашата Фејсбук страница или на e-mail: [email protected]
