Македонија: Преглед на настани (16-17 јули 2016)

Дневен преглед на најважните настани во Република Македонија (16-17 јули 2016 година): „Но Пасаран“ бара еднаков третман за заштита на податоци || Преговорите викендот паузираа || Опозицијата во Битола бара оставка од Талески || Караванот на слободата во Дојран || Гарет: Сите партии се согласија за СЈО

„Но пасаран“ бара еднаков третман за заштита на податоци

Здружението за заштита на граѓанските права „Но Пасаран“  ќе побара објаснување од Дирекцијата за заштита на податоците за нееднаквиот третман на граѓаните и отежнувањето на постапката за заштита на личните податоци. Ова здружение со месеци протестира против сметките за парно што им се доставуваат на граѓани кои се исклучени од системот.

Преговорите викендот паузираа

Преговорите на пауза за викенд, работните групи заглавени на прашањето за ингеренциите на министерот за внатрешни работи, но цврсто стојат на своите ставови. Според експертите, ваквото однесување на партиите не води кон договор. Поранешниот министер за внатрешни работи, Оливер Спасовски, вели дека за секоја идна влада – управувањето со МВР е од исклучителна важност. Со измените во законот за полиција, кои во Собранието беа изгласани по скратена постапка и без опозицијата, според СДСМ, министерот за внатрешни е заштитен како „англиска кралица“. Актуелниот министер, Митко Чавков, денеска изјави дека измените се направени според европски стандарди.

Опозицијата во Битола бара оставка од Талески

Опозициските советници од Битола повторно ќе бараат оставка од градоначалникот Владимир Талески и назначување на негов заменик на следната седница.  Револтирани се што курирска служба му ги носела документите на потпис дома и спопред нив, со домашниот притвор не му е ускратена можноста да ја врши функцијата и покрај финансискиот криминал за кој е осомничен.

Караванот на слободата во Дојран

Караванот на слободата, финансиран од УСАИД, имплементиран од ЦИВИЛ – Центар за слобода, со уметност и култура ќе ја зајакнува граѓанската свест и граѓанското учество и активизам. Караванот започнува со своите активности во рамките на Д – Фестивал 2016 што се одржа во Дојран. Тимот на ЦИВИЛ  се претстави со шеесетминутен мултимедијален настап, кој  вклучи и проекција на видео-содржини од граѓански новинари на темите социјална правда и активизам.

Гарет: Сите партии се согласија за СЈО 

Одговорност за злоупотребите откриени во прислушуваните разговори е основа за одржлив излез од политичката криза и е дел од Договорот од Пржино, вели британскиот амбасадор Чарлс Гарет. Во договорот за избори тој гледа само прв чекор, но останува да се спроведат сите реформи и да се врати кредибилитетот на демократските институции кои претрпеа огромна штета. Во Македонија, според него, посебно важно е прашањето на одговорност, па затоа и четворицата политички лидери се согласија да се формира СЈО.

ЦИВИЛ го објавува овој преглед на настани со цел да придонесе кон објективното информирање за настаните и процесите, но и за настани за кои еден дел од медиумите во Република Македонија не информираат или информираат многу малку. Вашето мислење е важно за нас. Ве молиме, вашите коментари, сугестии, информации, фотографии и видео прилози испраќајте ги на нашата Фејсбук страница или на e-mail: [email protected]к