Заменик на претседателот на Владата за европски прашања, Бојан Маричиќ во своја објава на Фејсбук дава свој осврт за инвестициите за сигурна енергетска иднина по повод Денот на енергетска ефикасност, 5 март.
Сите домаќинства, сите институции, сите компании, сите ние можеме да ги обезбедиме условите за добар живот и за сè што е потребно за деловен развој и со доста помала потрошувачка на енергија.
Енергетската ефикасност штеди енергија, но суштината е подлабока бидејќи крајниот исход е заштитена животна средина, заштедени финансии и свесни и одговорни генерации.
Со креирањето на заедничката европска енергетска политика и со вклучувањето на нашиот регион и нашата држава во неа, ЕУ покажа исклучива одговорност во заштита на населението од кризата предизвикана од руската војна врз Украина.
Покрај директната финансиска помош од ЕУ во износ од 80 милиони евра, Северна Македонија од Унијата добива и постојана поддршка во изградбата капацитети за искористување на обновливите извори енергија. Таков е примерот со најновата поддршка која ја добивме во февруари оваа година за реновирање на шест хидроелектрани низ државата и за нови ветерници кај Богданци.
СЕП, како единствена институција која може да аплицира проекти во име на државата во Инвестициската рамка за Западен Балкан, интензивно работи со институциите на апликации и на последниот, осмиот повик, аплициравме за следните два инвестициски грантови од областа на енергетиката и тоа:
Инвестиции за енергетска ефикасности во објекти во сопственост на Владата на Република Северна Македонија. Грант во износ од 2.5 милиони за интесвенирање и зголемување на енергетска ефикасност на 18 здравствени објекти, со вкупна инвестиција 27,5 милиони евра.
Зајакнување на мрежата за дистрибуција на струја во југоисточниот дел на државата. Грантот од околу 8 милиони евра ќе овозможи приклучок на мрежата за струја произведена од обновливи извори на енергија од хидроцентрали, соларни централи, ветерници и со тоа се зголеми независнота на земјата за производство на сопствена струја. Вкупната инвестиција е 34,4 милиони евра.
Инвестираме за сигурна енергетска иднина, но потребна е и енергетска одговорност од секој од нас. Тоа е мојата порака на Денот на енергетска ефикасност, 5 март.
