„Временска рамка за спроведување на правосудните реформи отсекогаш беше Стратегијата, сме имале Стратегија од 2017 која ќе трае до оваа година, и ќе имаме наредна петгодишна рамка од 2022 до 2027 година. Инаку петогодишната стратегија се имплементира на годишно ниво, за секоја година има приоритети и во рамки на една година се спроведуваат тие приоритети кои дел се законски решенија, а дел се други мерки кои не се врзани само за донесување на законски решенија, можат да бидат и подзаконски акти или друга институционална активност“, изјави Бојан Маричиќ, министерот за правда, на прашањето на ЦИВИЛ Медиа – Која е временската рамка на спроведување на правосудните реформи и на кој начин ќе се гарантира одржливоста на реформите, доколку успеат, во услови на тенко парламентарно мнозинство, а особено доколку дојде промена на власта во земјата?
Тој додаде дека Собранието отсекогаш функционирало со мнозинство од 61 пратеник, а сега има 62, но и да има 67 пратеника за двотретинските закони се потребни 80 пратеници.
„Двотретинските закони се оние за кои секогаш сме отварале дијалог и подадена рака, така било и во минатото од 2017 до 2020 година, така ќе биде и од сега. За клучните закони, процесните особено за кои се потребни двотретински гласови ќе се отвори дијалог со опозицијата и со сите партии и пратеници во Собранието. Во 2017 година Владата беше формирана со 62 пратеника, но во три наврати успеавме да собереме 80 пратеници и за Уставните измени и амандмани и за Законот за јавно обвинителство.
Парламентарниот живот и политичкиот дијалог овозможуваат секогаш да се постигне и поширока поддршка и поширок консензус за одредени прашања поврзани со реформите.
Владата е стабилна и има четиригодишен мандат и во рамките на тој мандат ќе испорача доволно реформи за да има аргументи да бара нов мандат. Во овој момент нема друго сценарио“, нагласи Маричиќ.
Дехран Муратов
