Сите граѓани на Република Северна Македонија се еднакви пред Уставот, но реалноста е поинаква и медиумите можат директно да влијаат врз јакнењето на еднаквоста, рамноправноста и заедништвото, беше оценето на денешниот вебинар на тема „Стереотипи и предрасуди – нивно зацврстување преку медиумите“.
– Доколку во портретирање на луѓето и нивната приказна се тргне од сфаќањето дека сите луѓе се исти, само така може да се „скрши“ стереотипната слика и предрасуда кон одредена маргинализирана група на граѓани, вели Христина Ѓорѓиевска, новинарка од Види Вака.
Кога се известува за маргинализираните групи потребно е новинарот да знае кој е терминот со којшто треба да ја означи заедницата, бидејќи зборовите имаат многу важна улога во истражувањето.
Кога се работи на новинарско истражување, Ѓорѓиевска посочи дека е од голема важност да не се приоѓа со предрасуди, стереотипи или погрешни информации кон припадниците на различните заедници, затоа што недостигот од информации резултира со неточно и необјективно информирање.
Мања Величковска од Коалицијата Маргини, во своето обраќање ја презентираше „Анализа на медиумското покривање на темите поврзани со ЛГБТИ заедницата и родово заснованото насилство“, достапна на следниот линк.
Анализата на Маргини покажува дека ширењето на моралната паника директно го загрозува унапредувањето на човековите права и борбата против дискриминацијата, критичка мисла и чувство за солидарност со другиот, кој е еднолично етикетиран како нанесувач на заканата.
– Прашањето околу правното признавање на родот, пак, стана особено сензитивно, а јавноста и понатаму останува недоволно сензибилизирана и образована за секојдневните предизвици со кои трансродовите луѓе се соочуваат. Моралната паника придонесе кон парцијално прикажување на нивните проблеми, а Предлог-законот за матична евиденција, кој требаше да им овозможи на трансродовите луѓе брза, транспарентна и пристапна постапка за правно признавање на родот, е повлечен од дневен ред во Собранието, покажуваат податоците од анализата.
Во анализата е наведено и одржувањето на втората по ред Парада на гордоста, на која имаше инциденти на физичко насилство врз ЛГБТИ лицата, а јавноста не успеа да ја разбере смислата на овој настан и потребата од негова реализација. Величковска вели дека одредени гласноговорници придонесоа кон зголемување на говорот на омраза кон ЛГБТИ луѓето на социјалните медиуми.
Вебинарот го организира Синдикатот на новинари и медиумски работници, во рамки на проектот „Дигитално организирање на ЦИЕ“ во партнерство со Union to Union, Меѓународната Федерација на новинари (ИФЈ) и Шведските синдикати на новинари.
