Алијансата за Албанците (АА) на чело со претседателот на партијата Арбен Таравари утре ќе го избира новото претседателство, а по Централното собрание новите партиски тела ќе ја разгледуваат можноста за влез во Владата и евентуалните преговори.
Според медиумите, Таравари, заедно со раководството на АА добиле понуда од премиерот Димитар Ковачевски за заедничка влада до следните избори, а понудата се состои од Министерството за здравство и Министерството за правда, и два заменици министри.
Од партијата потенцираат дека целиот процес е можност да се постигнат уставни измени.
„Приоритет е да се даде дополнителна година за да се даде можност за уставни измени, за да не пропадне процесот со избори, кои не се знае што ќе донесат потоа“, нагласуваат од партијата.
Претседателот на АА Таравари, на прашањето на ЦивилМедиа за прифаќање на понудата и сè друго што има врска со разговорите влез во влада, кратко одговори дека за сега, ништо не е дефинитивно.
Таравари пред неколку дена изјави дека постои можност Алијанса за Албанците да стане дел од Владата, а ако тоа не се случи треба да се оди на избори.
„Постои можност за влез во Владата. Конкретна понуда нема, но ние сме во постојана комуникација. Гледате како е во Собранието. Мислам дека сме 60-60. Собранието не може да создаде мнозинство без помош на Алијансата. Ако не станеме дел од Владата, тогаш одиме на избори. Нема друго решение. Сепак, приоритет за нас се уставните измени и затоа сме спремни да станеме дел од Владата за да го помогнеме процесот, рече Таравари во телевизиско гостување.
Н. Абдурахмани