ЦИВИЛ-Центар за слобода на 22 февруари поднесе барање за пристап до информации од јавен карактер до Министерството за култура.
Прашањата што ЦИВИЛ ги достави се однесуваа на целосна информација за сите патувања во Русија и во Украина, висина на поединечно исплатените надоместоци за трошоци за патување и престој, патни налози и извештаи за постигнатото на тие патувања во периодот 2007-2016 година, целосна информација (повик, одлуки, договори) за сите набавки од Русија и Украина во периодот 2007-2016 година, целосна документација (повик, одлуки, договори), како и информации за видот и вредноста на јавните набавки, поврзани со изведувањето на работите и опремувањето со експонати (повик, одлуки, договори) и со опрема (повик, одлуки, договори) во Музејот на револуционерната борба, како и информација за исплатените износи за репрезентација на екс-Министерката Елизабета Канчевска Милевска, за целиот период на раководење со Министерството.
Изутринава ЦИВИЛ доби повик и покана од Министерството за култура за подигање обемниот материјал што треба да даде одговор на поставените барања.
„Во името на ЦИВИЛ-Центар за слобода, секако, се надевам, дека можам и во име на јавноста да кажам благодарам. Се надевам дека јавноста ќе се согласи со ова што го работиме и дека ќе биде задоволна од одговорите што ги давате и дека ќе има свои коментари“, рече Џабир Дерала, претседател на ЦИВИЛ при примањето на материјалите.
Од министерството беа отворени за понатамошна соработка, како што изјавија остануваат на располагање за секое барење или информација.
„Остануваме максимално отворени за сѐ што е предмет на нашата работа и задолженија. Сакаме да бидеме отворени и транспарентни кон јавноста. Јавноста има право да ги знае сите бројки, сите податоци, секој денар кој што е потрошен на граѓаните на Македонија треба да биде образложен на соодветен начин… дали има злоупотреби и во кој правец се движиме и ние и културата во Македонија“, изјави Петрит Сарачини, посебен советник на министерот за култура.
ЦИВИЛ темелно ќе ја разгледа добиената документација и во континуитет ќе ја информира јавноста за наодите и колку тие одгвоараат на поставените барања
Биљана Јордановска
Камера: Дехран Муратов