„Многу пати бевме критикувани за донесувањето на некои одлуки, но тогаш кога ги носевме, не мислевме за самите нас и нашите политички кариери дали ќе победиме на следните избори. Напротив, мислевме за граѓаните и за она што претходно го кажав, за иднината на генерациите кои доаѓаат, иднина во која ќе им обезбедиме просперитет, стабилност, подобри услови за живеење, европски стандарди кои сите ги посакуваме“ рече пратеничката од СДСМ, Соња Мираковска на трибината „МК во ЕУ до 2030“ во Куманово.
Таа додаде дека иако трпеле напади и осуди од одреден дел од јавноста се покажа дека е исправна одлуката за уставните измени по Преспанскиот договор со кој се овозможи нашето членство во НАТО.
„Денес, по бруталната агресија на Руската Федерација врз Украина и стравот кај земјите како Грузија и Молдавија дека ќе снајде иста судбина како Украина зошто не се дел од НАТО, јасно ја потврдуват исправноста на нашата одлука да се зачлениме во овој воен сојуз. Денес се чувствуваме побезбедни и посигурни кога сме дел од оваа Алијанса, бидејќи нејзината правна рамка ни обезбедува заштита на сите ние кои од сме дел од неа“ рече Мираковска.
Пратеничката рече дека со вметнување на Бугарите во Уставот ние успеваме уште еднаш да потврдиме дека има разлика Македонците и Бугарите и дека не треба да се плашиме од овие уставни измени.
„Затоа, Ве молам да не потпаѓате на никакви провокации и лажни информации дека со вметнување на Бугарите во Уставот, ќе ни се одземе нашиот идентитет, затоа што со тој чекор, ние ќе успееме во спротивното: и во највисокиот акт на државата дома и пред целата меѓународна заедница, ќе потврдиме уште еднаш дека сме два различни народи: ние Македонци, тие Бугари. Но, и ќе докажеме дека како за сите заедници, така и за бугарската заедница, дека треба да се чувствува дел од оваа држава како и сите останати наши заедници“ рече Мираковска.