Премиерот Христијан Мицкоски на пратеничко прашање повторно ја истакна „борбата за животниот стандард“ како главен приоритет на владата. Тој обвинува дека СДСМ во периодот 2020-2023 година го уништиле животниот стандард со задолжување и лоши политики, додека актуелната влада „исправува грешки“.
Мицкоски го потенцира падот на инфлацијата под 4% и ја споредува потрошувачката кошничка во Македонија со европскиот просек, обвинувајќи ја опозицијата за „клевети“.
За минималната плата, премиерот вели дека треба да се зголеми, но дека работодавачите и синдикатите треба да се договорат, додека власта ќе „фасилитира“. Според него, куповната моќ на сегашната минимална плата е повисока од сите соседи, освен Грција.
„Дали треба повеќе да треба, еве јас сум првиот кој што тоа ќе го поддржи. Треба да биде најмногу. Ако гледаме од себични причина на Владата, ние можеме да прогласиме и да побараме од Законодавниот дом минимална плата од 600, 700 евра, ќе бидеме најголемите политички херои, дури и ние ќе профитираме бидејќи 705.000 вработени ние како влада сме работодавачи на 100.000 што значи дека придонесите на останатите 600.000 ќе доаѓаат на сметка на Владата. Но, дали економијата и бизнисот тоа можат да го издржат е прашање кое што работодавачите и работниците треба да си го одговорат. Затоа ние велиме ве молиме во дијалог вие да си го одговорите тоа прашање, ние можеме само да фасилитираме и да помогнеме во тој процес. Второ, грубо се манипулира со зголемена минимална плата во соседство и кај нас, бидејќи кај нас се збори за нето, а таму за бруто. Има голема разлика. Трето, според ЕВРОСТАТ, куповната моќ со минималната плата во Македонија, оваа моменталната, а не таа која ќе се зголеми со закон, е повисока од сите земји во соседството, минус Грција“, заклучи Мицкоски.
Иако Мицкоски говори за приоритети и економски успеси, неговото обраќање може да се оцени како префрлање на одговорноста на минатата влада без конкретни решенија за сегашните предизвици.
