„Она што јас го гледам, особено во изминатиов период е дека опозицијата се обидува да има добри односи со граѓанските здруженија, со невладините организации. Тоа е добро затоа што сите ние како политички партии мора да бидеме во тесна соработка со граѓанските здруженија, бидејќи тие се во непосреден контакт со граѓаните, а целта на политичките партии е да ги артикулираат барањата, гласовите на граѓаните“, смета пратенчката и претседателката на ДОМ, Маја Морачанин.
Во разговор со ЦИВИЛ Медиа, Морачанин зборуваше за бенефитите од внесувањето измени и дополнувања во Законот за граѓански здруженија и фондации и во Законот за политички партии, како и за разликата меѓу двата во однос на санкционирањето доколку не се испочитуваат законските одредби.
„Целта за поднесување на измените и дополнување на Законот за граѓански здруженија и фондации, потекна од предлогот на ВМРО-ДПМНЕ и како што и елаборираа – тоа е заради овие случувања во изминатиов период со отворање на клубови поврзани со имиња на фашистички соработници во времето на фашизмот и нацизмот и апсолутно тоа е недозволиво и нормално дека ги иритира граѓаните.Предлог Законот беше поддржан со консензус од сите политички партии. Паралелно со овој Закон се поднесе предлог Закон за измена на Законот за политички партии. Суштината и на едното и на другото законско решение е дека не треба да има ниту граѓански здруженија и фондации, ниту политички партии коишто во своето име, симболи, статут, програма, дејствување би овозможувале, поттикнувале фашизам, нацизам, нетолеранција, омраза по било која основа. Тоа е суштината на двата предлог закони“, вели Морачанин.
„За ДОМ антифашистичките, анти-националистичките вредности се дел од нашата програма, од нашето дејствување, затоа овие законски решенија за нас се прифатливи и затоа даваме поддршка. Се надевам дека овие законски измени и ќе се реализираат“, додава Морачанин.
Морачанин зборуваше и за потребата од спречување на промоција на идеологии кои се штетни за општеството.
„Идејата е само да се спречи промовирање на вакви апсолутно недозволиви, антицивилизациски случувања во однос на поттикнување на омраза, нетолеранција, фашизам, нацизам, дискриминација. Мислам дека партиите се оддалечуваат од вредностите кои барем им стојат во имињата, што не е случај во ЕУ“, рече Морачанин.
„Во предлог Законот нема такви законски одредби за соодветно санкционирање или што би се случило за политичките партии, за разлика од предлог Законот за Граѓанските здруженија и фондации, каде што се наведува дека во рок од три месеци, Здруженијата треба да го сменат своето име, програма. Доколку тоа не се случи ингеренциите се во Министерството за правда и министерот би требало во рок од четири месеци да даде мислење тоа здружение да престане. Во предлог Законот за политички партии нема таква одредница, но во понатамошната дебата можеби ќе има амандмани на Законот“, изјави пратеничката на ДОМ во контекст на отсуството на санкции во Предлог-законот за измени и дополнувања на Законот за политички партии.
Биљана Јордановска
камера: Дехран Муратов
монтажа: Ариан Мехмети