Стартот на политичката кампања беше некако мрачен. Доказ за тоа е и исклучувањето на струјата во домот на пратеникот Амди Бајрам од Сојузот на Ромите на Македонија, кој наводно крадел струја и не плаќал сметки на ЕВН. Пред да му ја исклучат струјата, претставниците на неговата партија на прес-конференција обвинуваа(т) дека директори и надлежни лица, поставени од СДСМ, вршеле притисок врз ромските државни службеници. Ете, лоша карма!
Случајно, пред извесен период, во Шуто Оризари беше исклучен автобусот на ЈСП со број 19. Преку петиција граѓан(к)ите на Шутка успеаја повторно да имаат автобуска линија со бројот 19. Можеби стравот од „пенкалото“ кој решава кој ќе биде градоначалник во Општина Шуто Оризари, ги натера противниците на Курто Дудуш од СДСМ, да му ги скинат плакатите.
Дека сè повеќе им се „стемнува“ на луѓето, покажува и оружениот напад на Абдула Абдули кој пукал во Алит Абази, независниот кандидат за градоначалник на Општина Кичево. Покрај Абази, повредени се и неговиот шеф на Изборниот штаб, Дестан Абдиу кој што беше застрелан во бутот на десната нога и е хоспитализиран во Клиничкиот центар, но е во стабилна состојба и Шабан Далипи, кому му била укажана помош во болницата во Кичево. Дечки, намалете со тоа пиштолите, дајте, гаѓајте се со идеи за подобар живот за кичевчани!
Навивачката група „Фемили Аеродром“ со факели им ја осветлиле ноќта на претставниците на СДСМ, додека траел партискиот митинг во Општина Аеродром. Кандидатот за Град Скопје, Петре Шилегов, во својот говор истакна дека со овие избори ќе биде извршен „политички погреб на Никола Груевски“. Другари, доста ни се погреби! Дајте идеи за подобри општини во Македонија.
Арбен Таравари од Алијансата на Албанците, во Гоствар истакна дека со одговорност и љубов ќе се посвети за подобрување на градот.
„Јас секогаш сум бил еден од вас и ќе бидам секогаш, бидејќи прашањето за Гостивар е прашање на достоинство, обврска, одговорност и пред сè, љубов кон родното место. Мојот тим располага со добри луѓе, а пред сè, способни. Сите заедно подготвивме програма која е релативно амбициозна и европска“.
Убаво ќе беше Таравари одговорно и со љубов да му се посветеше и на доброто на татковината, со тоа што немаше да го стави во „мирување“ – министерувањето во ресорот на здравство.
НДП и Унитети побараа од жителите на Чајле да гласаат за Шпати Исени, од Алијансата на Албанците, бидејќи бил син „на борец од настаните во 1997 година“. На граѓаните им требаат лидери кои ќе им го подобрат животот, доста им беа синови, чичковци, вујковци, братучеди… кои биле борци!
Со ваква, ем весела, ем темна политичка кампања, човек нема време на раат да седне и да гледа фудбал, Лига на шампиони или Куп на УЕФА. Обременет со целата политичка ситуација, „ми се стемни“ кога прочитав дека починал Хју Хефнер. Дали во кампањава некој од политичарите ќе вети дека ако дојде на власт, ќе му направи споменик во Скопје?
Дехран Муратов
