Додека демократскиот свет се згрозува од објавените ужасни видеа и фотографии на убиените цивили во киевското предградие Буча, медиумите поддржани од Кремљ, со лажни конструкции, истите ги прогласуваат за невистинити и исценирани и тврдат дека некои од снимките за убиствата се лажни, додека други укажуваат дека Украинците се одговорни за цивилното крвопролевање.
Ова е разработена тактики што Москва ја користи со години, со дезинформации да ја искривува вистината, што поддржувачите на Путин низ светот, вклучително и во Северна Македонија ја прифатија и понатаму ја шират по медиумите.
Меѓу првите „докази“ што ги лиферуваа проруските медиуми, е „обработеното“ видео од украински аматерски снимки кои првично беа објавени на социјалните мрежи и од украинските официјални лица, на кое се прикажува како во ретровизорот од автомобил во двишење се гледа како безживотно тело одеднаш ја движи раката.
https://www.youtube.com/watch?v=dYN_MLP0QkA
Ова видео „Сделано в России“ го објави и македонскиот портал „Think.mk“, под наслов „ЖРТВИТЕ ОЖИВУВААТ КОГА ЌЕ ПОМИНЕ КАМЕРАТА?“- ВИДЕО: ДОКАЗ ДЕКА МАСАКРОТ ВО БУЧА Е ИСЦЕНИРАН? – УМРЕНИТЕ ОЖИВУВААТ ОТКАКО ЌЕ ПОМНЕ КАМЕРАТА?.
Порталот инаку нема импресум, и не може да му се најде уредувачката структура. Видеото, и уште многу слични на него, дела на руската пропаганда, беше објавено на нивната веб страна и на Фејсбук профилот на, како што самите се нарекуваат „News & media website“, Друштво за размислување и разонода Think.mk – место каде можете да најдете приказна која ќе ја пополни празнината во Вашето секојдневие!
Каква разонода пронајдоа во објавување на снимки од убиени цивили и безживотни тела кои лежат по улици, знае само уредувачкиот тим на порталот, кој секако не може да се најде на страната.
Но „Дојче веле“ изнесува докази кои го побиваат ова тврдење изнесено во руското видео, а пренесено од порталот „Think.mk“.
Според ДВ, при проверката на факти е востановено дека во прикажаното видео нема ниту едно мртво тело што ја крева раката. Од ДВ го локализираа местото на настанот. Станува збор за улица „Јаблунска“, во јужниот дел од градот Буча. На Гугл стрит вју од 2015 година се препознатливи одделни објекти од видеото, иако на улицата има и нови градби. Колоната возила, од која е снимано видеото, возела во североисточна насока.
Тврдењето во видеото се однесува на наводно движење на рака на едно мртво тело. Станува збор за телото десно во сликата, покрај кое поминува колоната возила. Навистина се чини како нешто да се движи, кога снимката се приближува до телото, но тоа не е рака.
Анализата на снимката која ја изврши ДВ покажува дека станува збор за капка дожд на предниот дел од возилото од кое се снима. Оваа капка, која се движи нагоре поради ветрот предизвикан од движењето на возилото, создава впечаток на движење. Друга верзија на снимката со подобра резолуција недвосмислено покажува дека станува збор за капка вода, а не за движење на рака.
Дојче веле го замоли и дигиталниот форензичар Дирк Лабуде, професор на Високата школа Митвајда, за подлабинска анализа на видеоматеријалот. Лабуде притоа констатираше дека при движечкиот објект во видеото станува збор „само за детектиран артефакт на предниот ветробран на возилото од кое се врши снимање. При внимателна анализа, не се гледа никакво движење на телото”.
И Њујорк Тајмс објави сателитски снимки од Буча, кои докажуваат дека цивили биле убиени за време на окупацијата од страна на руските војници.
Анализата на сликите потврдува дека телата лежат на улица повеќе од три недели. Почнаа да се појавуваат на улиците на градот кон средината на март. Во тоа време, Буча беше контролирана од руски напаѓачи.
Така, публикацијата го побива тврдењето на Русија дека масакрот во Буча се случил откако окупаторите го напуштиле градот.
Сателитските снимки обезбедени од Maxar Technologies покажуваат дека најмалку 11 тела се на улиците од 11 март, кога Русија го окупираше градот.
„На пример, на фотографијата од 2 април се гледаат многу тела на улицата „Јаблунски“. Најмалку 11 од овие тела лежат на улица од 11 март. Понатамошните анализи покажуваат дека телата останале на оваа позиција повеќе од три недели“, се вели во соопштението.
Порталот, и покрај негативните коментари за објавеното лажно, манипулативно руско видео, продолжува со проруската агенда, и со несмалено темпо објавува дезинформации создадени од руската пропагандна машинерија.
Драган Мишев
