„Kој од вас ќе види некое зло нека го спречи, прво со рацете, потоа со јазикот, а доколку не може да го спречи со јазикот и рацете, тогаш нека го осуди со срцето, рекол Мухамед Алејхи Селам пред многу години. Ова го кажувам да покажам колку беше присутна верската пропаганда, колку се искористи религијата за руска пропаганда“ вели Дехран Муратов, ЦИВИЛ на почетокот од своето обраќање на конференцијата „Украина-Година на хероизмот“.
Муратов се осврна на состојбата во нашата држава и бројката граѓани што го поддржуваат путиновото злосторство против човештвото.
„Денеска сме сведоци на зло, крвопролевање, силување, терор, неправда, разурнати домови, храмови, болници, училишта, градинки…, но и покрај тоа, за жал и во нашата држава има путинољупци кои го подржуваат, одобруваат или релативизираат тоа злосторство против човештвото“, истакна Муратов.
Велејќи дека украинскиот хероизам покажува дека слободата нема цена, Муратов потенцираше дека нам овде, ни останува пишаниот збор, како најмоќно оружје против путиновото зло.
Хероизмот на украинскиот народ потврдува дека слободата нема цена!
„Пред сè нашата човечка обврска е да го спречиме злото на Путин без разлика на етничката, верската, професионалната или друга припадност.
Ние од оваа дистанца се спротивставуваме на путиновото зло со нашето најсилно оружје, а тоа е пишаниот збор, говорењето на вистината, разобличување на дезинформациите“, додаде Муратов.
Камера: Атанас Петровски/ Александар Ризински
Реализација и монтажа: Ариан Мехмети