Во врска со објавите за наводни изјави од страна на властите во Венецуела дека за време на изборите кои биле одржани на 28.07.2024 се случиле наводни хакерски, Ddos напади од корисници на македонски IP адреси, Министерството за внатрешни работи ја информира јавноста дека Секторот за компјутерски криминал ги следи случувањата во однос на наводните обвинувања кон македонски државјани.
„Исто така, наведуваме дека до сега не се пристигнати никакви барања или информации во однос на горенаведеното од страна на властите во Венецуела за понатамошни проверки од наша страна“, велат од МВР за ЦИВИЛ Медиа.
Според МВР, не значи дека појавувањето на ИП (IP) адреси од една земја, дека тие навистина изворно потекнуваат од таа земја, туку дека е можно да се дел од користење на ВПН, Ботнет мрежи или преку т.н. зомби компјутери.
„Ја информираме јавноста дека дури и појавувањето на македонски IP адреси во некаков наводен напад не значи дека истите изворно потекнуваат од Македонија, односно по досегашното искуство може да информираме дека постои голема веројатност истите да користат ВПН (Виртуелни приватни мрежи) или пак да се дел од поголема BotNet мрежа, односно да потекнуваат од таканаречени инфицирани зомби компјутери, кои се компромитирани од страна на хакери преку компјутерски вируси или малициозен софтвер и истите можат да извршат зададени задачи далечински управувани од поединци или група на потенцијални хакери“, велат од МВР.
Од МВР информираат дека најчесто жртви на ваквите зомби компјутери се лица кои не знаат дека нивните компјутерски системи се инфицирани со малициозен софтвер и без нивно знаење и согласност се вршат Ddos напади кои претставуваат злонамерен обид да се наруши нормалниот интернет сообраќај на зададениот сервер, сервис или мрежа за пристап до одредена цел во еден ист момент со цел да се блокираат или да се преоптоварат.
Од Секторт за компјутерски криминал ни одговорија дека работат исклучиво по пријава и барања од релевантни институции и дека доколку до Секторот пристигне барање или ако се контактирани од Интерпол во однос на горенаведениот случај за истото соодветно ќе постапат/одговорат.
Во меѓувреме, ЦИВИЛ се обрати со прашања за детали и за мерките што се преземаат и до министерствата за надворешни работи на Боливија и Северна Македонија, од каде што одговори сè уште нема.
Дехран Муратов / ЦИВИЛ МЕДИА
