Точно 82 проекта со квалитетна, естетизирано профилирана и вредносно издржана содржина беа дел од манифестацијата „Нов културен бран“ која се реализираше во два конкурсни рока за пет месеци (август-декември) во 2017 година – се вели во онлајн извештајот на Министерството за култура. Според извештајот, овие проекти се избрани како најуспешни од 348 проекти кои биле поднесени во Министерството, а вкупниот износ за спроведување на избраните проекти е 10.600.000 денари или околу 173.000 евра.
Ако се земе предвид бројот на проекти и опфатот на различни уметнички и културни области, како и бројот на учесници и публиката, може да се заклучи дека ова е прилично скромна сума. Оваа констатација се наметнува особено ако се обидеме да направиме споредба со милионските суми во евра кои претходната власт ги трошеше за апсурдни проекти кои не само што немаа уметничка вредност, туку беа штетни и деструктивни.
Понатаму, во извештајот на Министерството се објаснува дека манифестацијата „Нов културен бран“ се реализирала според мотото на Министерството за култура: „Култура до сите – култура за сите“.
„Целта беше да се поттикне и да се активира независната културна сцена, да се истакне значењето на граѓанскиот сектор преку делувањето на невладините организации, здруженија и асоцијации од областа на културата, за кои се смета дека можат да внесат посвежи идеи и иновативни пристапи во креирањето на културната понуда со проекти кои се во слух со времето“ – информира Министерството.
Деметрополизација и конкретна децентрализација на културните содржини беше уште една цел на „Нов културен бран“. Освен во установите од областа на културата, локациите на одржување на културните и уметничките содржини беа и други јавни и алтернативни простори, дури и нефункционални, руинирани објекти или простори кои се „рестартираа“ како уметничка сцена. Најголем број од активностите беа дисперзирани на ниво на целата држава, беа опфатени речиси сите градови (Битола, Кочани, Прилеп, Дебар, Штип, Демир Хисар, Струмица, Гевгелија, Крива Паланка, Берово, Делчево, Куманово, Неготино, Македонски Брод, Крушево, Свети Николе, Виница), а дел од програмата се реализираше и во помалите места, како: с. Бело – Кочани, с. Могила – Битола, с. Велуса – Струмица, с. Сермени – Гевгелија, с. Пештани – Охрид.
Се реализираа проекти од сите дејности од областа на културата, проекти со разновидна жанровска содржина, современи културни и уметнички изрази и вредности, и тоа: камерни, хорски и солистички концерти, настапи на фолклорни ансамбли, пејачки групи, изворни оркестри, рок, џез, гаражни бендови, театарски претстави, интересни ликовни претставувања, книжевни настани.
М. Л.
