За професорката д-р Мирјана Најчевска, по неуспешниот обид на мандатарот Никола Груевски, лидер на ВМРО-ДПМНЕ, да формира нова влада во законскиот рок од 20 дена откако го доби мандатот, во Македонија нема политичка криза. Според неа, постои демократска процедура којашто овозможува непречено продолжување на процесот на формирање влада. Таа е децидна дека според Уставот, претседателот на државата Ѓорге Иванов, во ваква ситуација мандатот го предава на следната партија со најмногу пратенички места, во конкретниот случај, на СДСМ.
„Воопшто не мислам дека во моментов има политичка криза, има демократски начин, процедури врз основа на коишто се оди понатаму. Кога една партија или партиска коалиција не може да обезбеди соодветно парламентарно мнозинство за да формира влада, се преминува на друга, којашто се очекува дека може да го формира тоа парламентарно мнозинство. Логичен чекор е сега на следната најголема партија да ѝ се даде мандатот и таа да се обиде да формира соодветно мнозинство. Доколку и таа политичка опција не може да формира, тогаш веќе може да се размислува или за нови избори, или за формирање на техничка или технократска влада“, смета професорката Најческа.
ЦИВИЛ Медиа: Има гласишта дека доколку и СДСМ не успее во намерите да обезбеди парламентарно мнозинство, мандатот би ѝ се дал на третата партија со најголем број пратеници, во случајот ДУИ. Кој е Вашиот коментар за ваква веројатност?
НАЈЧЕСКА: Се знае која од политичките партии има соодветна структурна моќ да формира мнозинство. Доколку на ДУИ ѝсе даде мандатот, таа повторно ќе треба да коалицира или со едната или со другата политичка партија, на која што претходно ѝ бил даден мандатот, односно, да формира влада. Тоа е веќе манипулација, односно изигрување и на правото и на Уставот. Она што може да се направи е политичките партии да се согласат околу заеднички мандатар и формирање на широка коалиција, или пак, околу заеднички мандатар и формирање на техничка, односно технократска влада. Или, во краен случај, нови избори. Меѓутоа, такво нешто, како давање можност на помалите политички партии за формирање влада во моментов, кога тие веќе биле во опција со поголемите партии, е изигрување на законот.
ЦИВИЛ Медиа: Во овој момент, мандатарот Груевски мандатот треба да му го врати на претседателот Ѓорге Иванов. Сега, на потег е повторно претседателот Иванов, или постапката се враќа во Собранието?
НАЈЧЕСКА: Претседателот го дава мандатот на следниот мандатар. Доколку претседателот на каков било начин одбие тоа да го направи, тогаш на сцена може да дојде Собранието.
Моника Талеска
