ВЕСТ НА ДЕНОТ
Мобилна станица за деконтаминација, донација од САД, НАТО сертификација за воените лица, силни пораки од Шекеринска за улогата на Армијата во стабилноста на земјата
Очекувам летово да заврши НАТО сертификацијата за воените лица кои го почнаа процесот, вели министерката за одбрана Радмила Шеќеринска, во однос на процесот на потребната НАТО сертификација на офицерите на Армијата.
„Задоволство ми е денеска што сме овде заедно за да покажеме на кој начин напредува нашата билатерална соработка со стратешкиот партнер и сојузник – САД, но како напредува и модернизацијата и опремувањето на нашата армија“, рече министерката Радмила Шекеринска на денешното примопредавање на мобилната станица за деконтаминација, донација од САД.
На примопредавањето, на кое присуствуваше и амбасадорката на САД Кејт Мари Брнз и тимот за обука од САД, беше извршена презентација на можностите на станицата која може да опслужи и до 50 луѓе наеднаш, како и презентација на извидничката опрема за откривање на радиолошко, хемиско и биолошко оружје.
„Кога Армијата е посилна, и државата е посилна“, рече таа. Амбасадорката Брнз рече дека мисијата на АБХО единицата е единствена и посебна не само затоа што е обучена да ги спасува граѓаните на Северна Македонија во војна туку затоа што и служи на државата во случаи на природни катастрофи и други предизвици.
ИЗЈАВА НА ДЕНОТ Џафери: Одложувањето на датумот сериозно ќе се одрази на политичко-економската ситуација во Северна Македонија
„Без одложување треба да се одреди датум за одржување на првата Меѓувладина конференција, со која ќе го означиме формалниот старт на преговорите за Република Северна Македонија. Секое одложување сериозно ќе се одрази на политичко-економската ситуација во нашата земја, но и ќе има свое влијание и на останатите земји во регионот кои споделуваат исти или слични отворени прашања со своите соседи, истакна претседателот на Собранието Талат Џафери во обраќањето пред членовите на Комитетот за надворешни работи (АФЕТ) на Европскиот парламент во Брисел.
ФЛЕШ ВЕСТИ
Образование Системот на образование е подготвен за три сценарија за новата учебна година – целосно отворање на училиштата и сите ученици да бидат во клупите, согласно здравствени протоколи и доколку биде стабилна епидемиолошката состојба. Министерката за образование и наука Мила Царовска рече дека тоа е најдоброто и најпосакувано сценарио кај сите во Владата.
ЕКО Премиерот Зоран Заев денеска рече дека е дадена инструкција со веќе објавениот тендер на владината Служба за општи и заеднички работи, да се види дали може од 20 до 50 отсто во набавката на службените возила да се вклучат електрични или еколошки возила.
Зелена акција На 13 јули официјално ќе започне постапката за подготовка на теренот за чистење на малата депонија со линдан во ОХИС, информираа денеска на брифинг во Министерството за животна средина и просторно планирање.
Развој Електронскиот систем за координација во планирањето, спроведувањето, мониторингот и евалуацијата на политиките за рамномерен регионален развој – sirera.mk , наречен СиРеРа денеска официјално беше предаден на управување на Министерството за локална самоуправа.
ЦИВИЛ
ЦИВИЛ на прес конференција: Отворено за сите прашања
ЦИВИЛ организира прес конференција под наслов „Отворено, за сите прашања“ на 29 јуни (вторник), во хотел Парк Резиденс & Спа (зад градскиот фудбалски стадион), сала Њујорк, со почеток во 11 часот.
Прес конференцијата ќе се емитува во живо на Фејсбук страницата и на видео каналот на ЦИВИЛ.
Пресот е отворен и за новинарски екипи со физичко присуство. За време на преносот во живо, може да се поставуваат прашања во писмена форма, со порака на Фејсбук или на мејлот civil@civil.org.mk.
Како се одвива и како ќе се одвива изборниот мониторинг на ЦИВИЛ оваа година? Кои се постигнувањата и предизвиците од досегашната имплементација на проектот „Европски перспективи, следно ниво“ во дадените општествено политички прилики? Што претставува проектот „Зелено општество за сите“? На кој начин се одвива иницијативата „Направи разлика: Почитувај ги различностите“?
На прес конференцијата, претседателот на ЦИВИЛ, Џабир Дерала, ќе одговара и на сите други прашања за кои се интересира јавноста.
По прес конференцијата, ЦИВИЛ ќе одржи и јавен настан „Невладините под лупа“, со почеток во 12 часот.
Јавен настан на ЦИВИЛ: Невладините под лупа
ЦИВИЛ организира панел дискусија на тема „Каква е улогата на граѓанските организации во општествено-политичките процеси?“, што ќе се одржи утре, 29 јуни, во хотел Парк Резиденс&Спа, Скопје, со почеток во 12 часот.
Говорниците, претставници на граѓански организации на панел дискусијата ќе зборуваат за јавната перцепцијата за граѓанските организации, каков е нивниот удел во политичките и општествените процеси, дали граѓаните ги доживуваат како „фолиранти“ или „прогресивци“, колку се транспарентни во нивната работа и низа други прашања што се однесуваат на улогата и придонесот на граѓанските организации во политички и општествен контекст.
СЛОБОДНА ЗОНА
„Еден мој пријател вели дека само кога си на мостот ја чувствуваш реката, зошто кога си на брегот таа е само водотек кој ги разделува бреговите. Затоа, кога си на средина од мостот сите мисли ти се „мостопитни“, во секоја од нив бараш подлабока содржина и причина за спојување и делби, пишува Војо Маневски во колумната „Мостопитни“
Д. Тахири
