Какво мнозинство и да одбере владата, Нова демократија нема да гласа за ратификација на договорот, соопштуваат од грчката опозициска партија, јави дописничката на МИА од Атина.
Коментирајќи ја изјавата на лидерот на Независни Грција, коалициониот партнер во грчката влада, дека бара 180, наместо 151 пратеник за грчкиот парламент да го одобри договорот со Македонија, од Нова демократија велат дека „не постојат зборови да се опише Панос Каменос“, кој е „олицетворение на политичкото самопонижување“.
– Изјавата дека договорот од Преспа треба да се ратификува од 180 пратеници, но и дека тој ќе гласа против, ќе остане во историјата како олицетворение на политичкото самопонижување. Нова демократија, се подразбира дека нема да го ратификува договорот, какво мнозинство и да одберат господата Ципрас и Каменос. Заедно го потпишаа и целосно ја носат одговорноста за завршените работи што веќе се создадоа на товар на Грција, соопштуваат од Нова демократија и додаваат дека е неопходно што е можно поскоро да се одржат избори.
(МИА)
