Директорот на прилепската гимназија „Мирче Ацев“, Кире Николоски за ЦИВИЛ Медиа тврди дека пред своите ученици не држел политички говор, туку во непосреден разговор, им ги предочил националните интереси. Тој смета дека во ниту еден момент, не ги пречекорил своите овластувања, ниту како директор, а особено не – како професор по историја.
„Откако 90 отсто од учениците заминаа на протестите на сите средношколци против ‘Тиранската платформа’, со тие што останаа, не повеќе од 20-мина, разговаравме за националните интереси на државата… Не држев говор, туку разговарав за националните интереси, им понудив да им одржам и час по историја. Им кажав дека не е добро да се уништат македонските национални интереси, да се спроведува ‘Тиранската платформа’, платформа на друга држава, која што предвидува воведување двојазичност на цела територија, менување на името, на химната, на знамето и осудување на партизаните кои ја создале Македонија, за геноцид. Не гледам каде сум ги пречекорил овластувањата“, изјави за Николоски за ЦИВИЛ Медиа.
Тој нема одговор, дали гимназијата ќе преземе мерки и ќе ги санкционира со неоправдан изостанок, учениците коишто ги напуштиле денеска часовите, и заминувале на протести.
„Ќе ги разгледаме околностите, немам засега одговор“, изјави директорот Николоски. Тој е еден од најистакнатите членови на Општинскиот комитет на ВМРО-ДПМНЕ во градот. Но, ги отфрла сите обвинувања дека во рамки на својата педагошка работа, ги инволвира своите политички ставови.
„Ако пак ме прашувате политички, немам дилема, јас сум против која и да е политичка партија, која што ќе ја прифати Тиранската платформа“, категоричен е директорот Николоски.
Утрово граѓански новинар до ЦИВИЛ Медиа испрати видео материјал, снимен од еден од учениците, во кој се слуша разговорот меѓу директорот и учениците. Една од ученичките го прекорува директорот.
„Директоре уште поголем срам е во образовна институција, Вие да ни држите политички говори“, вели ученичката.
Зa прилепските социјалдемократи недозволиво е директори да повикуваат ученици да бојкотираат настава за да бидат дел од протести на кои се поттикнува и шири етничка и национална омраза.
„Тоа е кривично дело! Наместо да ги заштити учениците, директорот на прилепската гимназија ‘Мирче Ацев’, Кирил Николоски, лично ги повикувал учениците да учествуваат во протести, со кои се шири етничка и национална омраза, како што може да се види од видеото што излезе во јавноста, преку социјалните мрежи. Институциите се должни веднаш да ги санкционираат ваквите злоупотреби.Никој нема право да шири партиска пропаганда, да држи партиски говори и да манипулира со деца во образовните институции, за лични партиски и криминални цели“, стои во реакцијата на ОО на СДСМ од Прилеп, од каде потенцираат дека „демократските процеси во Македонија, водат кон формирање нова реформска влада, којашто ќе го врати достоинството на образовните институции и ќе спречи ваква скандалозна злоупотреба на ученици“.
По СДСМ, се огласи и прилепскиот Општински комитет на ВМРО-ДПМНЕ.
„Добро ќе беше да пуштевте соопштение кога средношколците штрајкуваа против екстерното тестирање со директна поддршка од вас и вашите функционери! За вас е грешно човек да си ја сака сопствената држава! Да си ја сака Македонија! Денеска, средношколците протестирале за Македонија, против двојазичност и федерализацијата на Села и Заев! Засрамете се и придружете им се на организаторите на протестите за Заедничка Македонија! Не дозволувајте други да ви ја продаваат гордоста и идентитетот! Бидете на браникот на татковината!“, повикуваа ОК на ВМРО-ДПМНЕ од Прилеп.
Инаку, за време на протестите на Средношколскиот пленум, вратите од прилепската гимназија и сите други училишта во Прилеп беа затворани. Додека учениците реагираа затоа што „се спречувани да одат на протест“ против воведување на екстерно образование, директорите од училиштата ја убедуваа јавноста дека практика е да бидат вратите заклучени, зашто се води сметка за безбедноста на средношколците.