По вчерашните консултации и разговори со коалициските партнери ДУИ и Алијанса за Албанците, и со Беса која одлучи да остане во опозиција, на полноќ, мандатарот Зоран Заев до Собранието ја достави Предлог-програмата и Предлог составот на новата Влада.
Претседателот на Собранието, Талат Џафери, за утре во 11 часот закажа седница за избор на новата Влада, што треба да се избере најдоцна до вторник на полноќ.
Според Предлог составот, на списокот на 15 министерски места се: Радмила Шеќеринска – министерка за одбрана, Оливер Спасовски – министер за внатрешни работи, Драган Тевдовски – министер за финансии, Роберт Алаѓозовски – министер за култура, Дамјан Манчевски – министер за информатичко општество и администрација и Мила Царовска – министерка за труд и социјални политики.
Хазби Лика од ДУИ е предложен за вицепремиер за спроведување за Рамковниот договор, Бујар Османи за вицепремиер за еворинтеграции, Крешник Бектеши за министер за економија, Булент Салиху за министер за правда и Садула Дураку за министер за екологија.
Министри без ресор ќе бидат Кочо Анѓушев, Роберт Поповски, Едмонд Адеми, Аднан Ќахил, Самка Ибраимовски, Зорица Апостоловска и Зоран Шапуриќ.
ДР – ДПА во новата Влада ќе биде со свој министер за здравство, најверојатно, Арбен Таравари, а НДП со предлог министер за локална самоуправа, Сухејл Фазлиу.
На вчерашната прес-конференција, мандатарот Заев изјави дека Беса, и како опозиција ќе ја поддржи секоја иницијатива за интересите на Албанците и државата, а претходно од Беса најавија дека нема да бидат дел од новата Влада, бидејќи мандатарот не е подготвен да ги прифати нивните принципи за заедничко владеење и да потпишат заеднички договор.
За составот на новата Влада треба да гласаат најмалку 61 пратеник во 120-членото Собрание.