„Чувствувам морална одговорност што во овие четири месеци, колку што сум министер, не успеав да го тргнам влијанието на политичките структури во МВР и затоа ќе барам мое повлекување. Но, ве уверувам дека ќе направам сѐ за создавање услови за мирен трансфер на власта. Ќе барам кривична и морална одговорност од раководните структури на МВР и на Оперативниот штаб за вчерашните настани“,изјави Агим Нухиу, министерот за внатрешни работи на денешната прес-конференција.
Нухиу го осуди насилството и крвавиот инцидент во македонскиот парламент . Посочи на директорот на Бирото за јавна безбедност, Митко Чавков кој како што рече, иако бил назначен за раководител со Оперативниот штаб на МВР, што бил формиран од почеток на протестите „За заедничка Македонија“, бил недостапен од екслацијата на состојбите до 20 часот.
„Оперативниот штаб чиј што раководител е Митко Чавков, имаше подготвени план за итна интервенција во три случаи: доколку има мирен протест, при избор на претседател на Собранието и при избор на претседател на владата. Но,синоќа на моите телефонски повици не одговараше раководителот на Бирото за јавна безбедност од почеток на ескалацијата на ситуацијата, па до 20 часот. Тој не беше ниту на своето работно место. Политичкото влијание на структурите во МВР е за секаква осуда“, изјави министерот Нухиу, во обид да ги презентира причините, зошто МВР синоќа пофрли и дозволи да се случи крвав инцидент во Собранието.
Тој, сепак, му го честиташе мандатот на новоизбраниот претседател на парламентот, Талат Џафери, а по мирниот премин на власта, најави своја оставка, како морален чин.
Од друга страна, како што соопшти Обвинителството со кое раководи Марко Зврлевски, будно се следат настаните.
„Се преземаат дејствија за расветлување на настаните и утврдување на фактите. Согласно своите надлежности, Јавното обвинителство ќе постапува во сите случаи, каде ќе биде утврдено постоење на елементи на сторено кривично дело и за секој од настаните по документирањето ќе биде донесена соодветна јавнообвинителска одлука“, стои во соопштението.
М. Талеска