„Во моментов, јас сум против влезот на Украина во Европската Унија“, изјави новоизбраниот полски претседател Карол Навроцки за унгарскиот медиум „Мандинер“ во интервју објавено на 7 јуни, пренесува Кијив Индипендент.
Сосема очекувано од еден политички радикал, познат по практицирањето на „трамповски“ стил на политика, кој противењето на влезон на Украина во ЕУ и НАТО го втемели во својот предизборен настап, и не случајно, спротивставувањето на проевропскиот пат на Кијив го искажа во интервју за унгарски медиум.
Иако, за разлика од другите евроскептични лидери во Европа, вклучувајќи го словачкиот премиер Роберт Фицо и унгарскиот премиер Виктор Орбан, Навроцки не изразува проруски ставови, тој постојано го обвинува претседателот Володимир Зеленски дека ги искористува сојузниците.
„Од една страна, мора да ја поддржиме Украина во нејзиниот конфликт со Руската Федерација, но Украина мора да разбере дека и другите земји, вклучувајќи ги Полска, Унгарија и други европски земји, исто така имаат свои интереси“, рече тој.
Навроцки победи во вториот круг од полските претседателски избори на 1 јуни со 50,89% од гласовите. Тој претходно изрази противење на членството на Украина во ЕУ и НАТО, и покрај тоа што го поддржува суверенитетот на Украина.
„Полска има таков интерес, на пример, за ексхумација на жртвите од Волин (масакрот)“, потенцира Навроцки, иако полските и украинските истражувачи веќе започнаа со ексхумација на жртвите од масакрите од Втората светска војна на 24 април во Западна Украина, што беше прва ваква ексхумација од 2017 година, кога Украина воведе мораториум како одговор на уништувањето на спомениците на Украинската бунтовничка армија (УПА) во Полска.
„За време на кампањата, не се согласив, и како претседател, нема да се согласам, со нелојална конкуренција со Украина за полското земјоделство или логистичкиот сектор“, рече Навроцки.
Царините на ЕУ за украинскиот извоз на земјоделски производи беа обновени на 6 јуни, поради противењето на украинскиот извоз и неговото пристапување кон ЕУ од источноевропските членки, вклучувајќи ги Унгарија и Полска.
„Ја гледам Украина како земја која, иако многу храбро се брани од Руската Федерација, мора да ги почитува и интересите на другите земји кои инаку ја поддржуваат Украина“, рече тој.
Иако Полска има парламентарен систем во кој овластувањата на претседателот се во голема мера церемонијални, полскиот претседател, сè уште може да стави вето на законите предложени од парламентот.
Покрај тоа, претседателот игра клучна улога во надворешните работи и служи како врховен командант на вооружените сили. Полските претседатели историски биле особено активни во обликувањето на источната политика.
Се чини дека Европа, во новиот полски претседател доби уште една закана за единството на Унијата и кочничар на демократските процеси.
Д. Мишев
