Македонија, денеска го одбележува 9 Мај – Денот на Европската унија и Денот на победата против фашизмот.
Делегацијата на Европската унија во Македонија, во соработка со повеќе амбасади, општини и организации, со повеќе од 30 настани, го одбележува 67-миот роденден на Унијата.
Како што информираат од Делегацијата на ЕУ, станува збор за најразлични настани поврзани со спортот, како „Скопскиот маратон“ и турнири во фудбал, настани од културата, потоа годишниот матурски танц за матурантите од средните училишта, како и бројни дебати, предавања, натпревари и локални фестивали.
По тој повод, во 12 часот, од членовите на ЕУ Инфомрежата беа организирани повеќе настани во Дебар, Охрид, Кавадарци, Гевгелија, Кочани, Битола, Тетово, Гостивар, Струмица, Крива Паланка, Велес и во Куманово.
Како дел од одбележувањето на Денот на Европа, организиран е „ЕУ автобус“, што ќе патува низ земјата и ќе престојува во Петровец, Негорци, Просениково, Србиново и во Пласница.
На денешен ден во 1950 година, Роберт Шуман го презентираше предлогот за создавање организирана Европа, со цел одржување на мирот на европскиот континент, којшто беше разурнат од војните. „Шумановата декларација“, се смета за почеток на формирањето на она што денес го препознаваме како Европска унија.
Одбележувањето на Денот на победата над фашизмот започна уште викендов, кога Амбасадата на Руската Федерација во Македонија организираше повеќе настани во Битола и во Скопје.
Амбасадата на Русија организира и полагање венци цвеќе пред Споменикот на загинатите партизани кај хидроцентралата „Матка“, а ќе бидат одржани и повеќе други културни настани.
Во Кинотеката на Македонија, со проекцијата на „28 Панфиловци“ (2016), филм од најновата руска продукција, ќе биде отворена „Неделата на рускиот филм“, во која проекциите ќе се одвиваат до 13 мај.
На 9 мај 1945 година, Германија потпиша капитулација во Втората светска војна, во која животите ги загубија повеќе од 50 милиони луѓе.
Македонија за време на Втората светска војна беше дел од антифашистичката коалиција. Во борбите против фашистичките окупатори, само во вардарскиот дел на Македонија загинале 33.000 луѓе, вклучувајќи ги и преку 7.000 македонски Евреи, кои биле депортирани во концентрациониот логор „Треблинка“.
Минатата година, Денот на победата над фашизмот беше одбележан со масовен протест на Шарената револуција. Со транспарент: “Антифашизам. Вчера, денес, утре. Борбата продолжува“, демонстрантите порачаа дека нема да престанат да се борат за слободата во Македонија.
М. Т.
