По повод Mеѓународниот ден на Ромите – 8 април, Советот на Европа ќе организира голем број настани во пресрет на чествувањето на ромската култура, како и за подигнување на нивото на свеста на пошироката јавност – за состојбата, прашањата и проблемите поврзани со непочитувањето на човековите права, со кои се соочуваат Ромите. По повод 8 април, со соопштение излезе и Рекс Тилерсон, државен секретар на САД, кој им го честиташе Денот на Ромите на повеќе од еден милион Американци со ромско потекло.
Во Македонија, по повод одбележувањето на Меѓународниот ден на Ромите, претседателот Ѓорѓе Иванов, се сретна со претставници на политичките партии на Ромите во Република Македонија. На средбата било истакнато дека Република Македонија во европски рамки е лидер во почитувањето на правата на Ромите, како рамноправна заедница со сите други заедници во државата, согласно нивните уставно загарантирани права.
Со ваквите заклучоци од средбата на Иванов со претставиниците на ромските партии, единствено не се согласил Самка Ибраимовски, лидерот на ПЦЕР, кој ја одбил поканата од Иванов за честитање на националниот празник на Ромите.
„Ромите не живеат само еден ден, годината има 365 дена, тоа е едната причина, а втората причина е што го потпиша Законот за патни исправи – за одземање на пасошите на Ромите од граничните премини. Зошто тогаш не размисли, како што сега размислува за мандатот што не го дава на Зоран Заев. Законот за патни исправи јас го поништив преку Уставниот суд, но каде е неговата одговорност како претседател кој го потпиша тој закон и каде беше кога ги враќаа Ромите од граница“ изјави Ибраимовски за медиумите.
По повод денешниот празник се огласи и здружението на Ромите „Ромска ѕвезда“ од Битола кое посочува дека во однос на проблемите со кои се соочува оваа заедница, главни приоритети се вработувањето и образованието.
ЦИВИЛ – Центар за слобода, во изминатата година забележа тешки кршења на човековите права на Ромите. Од податоците со кои располага ЦИВИЛ, најголем дел од овие прекршоци се однесуваат на злоупотребата на малолетниците, поткупот на гласачи, како и ненавремено пружање помош и поддршка, како од здравствените институции, така и од државата во целост.
Најсвежи примери за негрижата на државните институции се смртните случаи на двајцата млади Роми, Ердал Јусинов и Андриас Реџепов, во затворите во Идризово и во Штип.
