Во „Јавна соба“ во Скопје, во тек е првата самостојна изложба на фотографии на Божидар Барлакоски од Прилеп.
Фоторепортерот Барлакоски е роден во 1984 година во Прилеп, активно работи со фотографија седум години и член е на Фото-кино клубот “Прилеп“. Добитник е на повеќе од дваесет меѓународни награди за фотографија, меѓу кои и бронзен медал за фотожурнализам од Toronto Camera Club, PSA сребрен медал за фотографија во Кипар, Сребрен медал за фотографија во Украина, Гран при – златен медал за колекција на фотографии на денови на македонската фотографија 2014 година..
На изложбата „Окото на градот“ тој на публиката и претставува 37 свои фотографии за кои вели:
„Фотографиите се сублимат на неколкугодишно гледање на градот преку објективот и како тој нѐ гледа нас. Урбаната средина фатена низ фотографии од секојдневни моменти на животот кој врие на секој агол, зад кулисите на градот. Окото на градот, од сите страни и за сите лица на градот… Работата како новинар и фоторепортер дополнително ме направи добредојден во тој свет чие лице не е ’модерно‘ да
се покажува, да се доближам до автентични луѓе, живи споменици кои не отсјајуваат како оние бронзените по плоштадите, а сепак, многу повеќе го заслужуваат нашето време и внимание“.
Барлакоски е соработник на ЦИВИЛ – Центар за слобода и како граѓански новинар испраќаше свои прилози и фотографии за кои беше наградуван со трета награда, а во март 2016-та и со втора награда на натпреварот „Биди граѓански новинар“.
