Омбудсманот на Србија Зоран Пашалиќ на 8 април за Радио Слободна Европа потврди дека ќе биде покрената постапка за тоа кој дозволил претседателот на Србија и новинарите да влезат на интензивна нега во Клиничкиот центар на Србија, на посета на повредените од пожарот во Кочани, јавуваат српски медиуми.
Пашалиќ рече дека постапката ќе биде покрената на „иницијатива“ на блокираните студенти.
Медиумите претходно ја пренесоа изјавата на Пашалиќ дека ќе контактира со Министерството за здравство преку кое се врши контрола на Клиничкиот и Ургентниот центар.
Студентите во блокадата на 7 април го објавија своето шесто барање, барајќи отстранување на оние што ги сметаат за одговорни за посетата на претседателот на Србија, Александар Вучиќ.
По пожарот во дискотеката во кој загинаа 61 лице, дел од тешко повредените пациенти се пренесени на лекување во Белград.
Тие беа сместени во одделението за интензивна нега на Ургентниот центар на Универзитетскиот клинички центар на Србија (УКЦС), каде Вучиќ заедно со медиумски тимови ги посети на 17 март.
Вучиќ тогаш рече дека имал можност да ги посети пациентите повредени во пожарот во Северна Македонија.
Студентите во блокадата бараат покренување постапка за утврдување одговорност и разрешување на директорката на УКЦС Јелена Друловиќ, директорот на Ургентниот центар на УКЦС Марко Ерчеговац и началникот на одделението за интензивна нега во Ургентниот центар на УКЦС, Душан Мициќ.
„Овие лица прекршиле низа хигиенски мерки кои имаат за цел да ги заштитат пациентите од фактори на ризик, кои можат да доведат до сериозна закана по здравјето и животот на пациентите“, се наведува во нивното соопштение.
Д. Т.
