„Конгресменот Дана Рохрабакер (републикански претставник од Калифорнија) уште еднаш се посрамоти себеси, неговите гласачи и неговата партија, со крајно неодговорниот напад против Република Македонија. Ги повикуваме претседателот на Конгресот, Пол Рајан и лидерот на мнозинството во Конгресот, Кевин Мекарти итно да го отповикаат конгресменот Рохрабакер од неговото претседателство на овој значаен Поткомитет во Конгресот и го повикуваме претседателот Доналд Џ. Трамп да упати критика кон Рохрабакер за неговите коментари“, стои во барањето на ОМД.
Претседателот на ОМД, Методија А. Колоски изјави дека “напредокот кон стабилност во регионот е секогаш заснован на меѓународна гаранција за непроменливост на државните граници. Со ваквата директна изјава на високо позициониран претставник од Републиканската партија за уништување на Македонија, истовремено сериозно се поткопува политиката на САД во Југоисточна Европа и позициите на претседателот Доналд Трамп.”
Во текот на интервјуто за „ТВ Висион Плус” од Албанија, конгресменот Рохрабакер изјави “со жалење изјавувам дека (Македонија) не е држава… Косоварите и Албанците од Македонија треба да станат дел од Косово. Другиот дел од Македонија треба да стане дел од Бугарија или било која друга држава на која сметаат дека и припаѓаат. Идејата дека треба да ја одржуваме Македонија во живот, бидејќи некој пред 30 години одлучил вака, како најдобро решение по распадот на Југославија, не е доволно оправдание дека оваа идеа треба уште да постои“.
Вчера и Министерството за надворешни работи, преку македонската амбасада во Вашингтон, побара став од Стејт департментот на САД за изјавите на американскиот конгресмен Рохрбакер.
