Опожарен е влезот од гаражата од новинарот, Зоран Милошески, сопственик на порталот „Публикум“ и добитник на наградата за граѓански новинар на ЦИВИЛ – Центар за слобода. Како што потврди СВР Битола, инцидентот се случил ноќеска, половина час пред полноќ, истрагата е во тек, а причинета е мала материјална штета.
„Непознат сторител истурил запалива течност пред влезот од гаражата на новинарот. Распламтениот оган го забележал соседот и тој го пријавил случајот во прилепската полиција. Извршен е веднаш увид. Констатирано е дека не се причинети материјални штети во гаражата во којашто се наоѓало возилото. А, во непосредина близина на гаражата имало паркирани и други возила. Но, соседот сам со снег го изгаснал огнот. Истрагата е во тек. Досега не се откриени можни сторители на настанот“, изјави за ЦИВИЛ Медиа, портпаролката на СВР Битола, Сања Стаматовска.
Новинарот Милошески не може да посочи на конкретен сторител.
„Точно е дека сум се соочил во закани досега. Ми праќале пораки, ми ѕвонеле со скриени телефони, ми се заканувале на разни начини. Сум пријавувал и во полиција… Но, до денеска не се случило ништо конкретно“, вели Милошески.
Во прилепската средина Милошески е познат како еден од ретките новинари со остро перо. Освен што е сопственик на критички настроениот портал „Публикум“, тој е дописник на неделникот „Фокус“ и на порталот “Слободна Македонија“. Добитник е и на награда за најдобра сторија на граѓански новинар што ја доделува ЦИВИЛ – Центар за слобода во рамките на проектот „Граѓански објектив“.
Моника Талеска