Група мажи физички го нападнаа српскиот опозициски политичар Драган Ѓилас и член на неговата партија во Белград ноќта меѓу четвртокот и петокот, а Српската напредна партија (СНС) го обвинува Ѓилас дека го предизвикал конфликтот, објави ББС на српски.
Младите момци лепеле плакати со кои го обвинувале лидерот на Партијата за слобода и правда (ССП), најголемата опозициска партија во српскиот парламент, за кражба на државни пари, кога им пришле Ѓилас и Ѓорѓе Алексиќ, пратеник на ССП, објави партискиот пратеник Мариника со снимка од настанот на социјалната мрежа Х.
Banditi koji lepe plakate tuku Dragana Đilasa… pic.twitter.com/CFFIOY9naZ
— Stranka slobode i pravde (@SlobodaIPravda) December 19, 2024
Полицијата се уште не коментирала.
Партијата на Ѓилас објави дека меѓу напаѓачите е и Лука Петровиќ, висок функционер на владејачката Српска напредна партија (СНС) и секретар за инвестиции во белградската администрација.
На прес-конференцијата во петокот наутро, Лука Петровиќ потврди дека бил на местото на конфликтот, тврдејќи дека Ѓилас ги предизвикал инцидентите и тепачката, нарекувајќи го „тотален идиот“.
„Младите на СНС само си ја вршеа работата со лепење плакати, додека Ѓилас и неговиот телохранител ги нападнаа младите кои беа многу добри во одбраната“, рече Петровиќ.
Ѓилас и Алексиќ по конфликтот отишле на преглед во Ургентниот центар.
Што се случи?
На видеото од ССП објавено на социјалните мрежи се гледа како група мажи со качулки преку глава стојат покрај ѕид во општина Вождовац на кој се излепени плакати против Ѓилас, а на еден графит пишува дека тој е „крадец“.
Слични плакати против Драган Ѓилас, како и други претставници на опозицијата, се појавија на улиците на Белград и на други места претходно.
Во придружба на неговиот соработник, Ѓилас им приоѓа на група млади момчиња и ги прашува: „Што лепите? Ова е лага“.
Човекот му одговара: „Што е проблемот? Ти си крадец“.
Настана гужва и викање, а се слушна и машки глас: „Нема тепачка“.
Потоа на видеото на ССП се гледа размената на удари, се слуша женски глас, која цело време снима со мобилен телефон и се обраќа на групата млади момчиња: „Кажете само кој ве пратил“.
На видеото потоа се гледа како група мажи и Ѓилас се судираат, а женски глас вели: „Еве, го тепаат лидерот на опозицијата“.
Се чини дека Ѓорѓе Алексиќ, кој бил со Драган Ѓилас, се обидел да спречи физичка пресметка, а потоа неколкумина почнале да го удираат по грбот, а потоа да го клоцаат додека лежел на улица.
„Полиција, доста, доста“, повторно се слуша женски глас.
Ѓорѓе Алексиќ за N1 изјави дека кога го собориле Драган Ѓилас на улица, „буквално почнале да го клоцаат“.
Легнав врз него, а тие продолжија да не удираат со клоци и двајцата“, изјави Алексиќ.
Ѓилас и Алексиќ потоа отишле на преглед во Ургентниот центар, каде им биле констатирани повеќе повреди, пренесуваат медиумите.
Што вели Ѓилас, а што СНС?
„Тоа не беше тепачка – ние сигурно не дојдовме овде да се бориме со десет од нив“, изјави Ѓилас за N1 по прегледот.
„До вечерва мислев дека тоа што сум пратеник и лидер на опозициската партија ме штити – очигледно не бегаат од ништо. Можам само да ги советувам луѓето да го чуваат мирот и животот затоа што човечката глава е повредна од се“, рече лидерот на ССП.
Лука Петровиќ, функционер на СНС, одговори дека „една од најнормалните и најредовните партиски акции спроведени од подмладокот на СНС се претвори во крвопролевање со тотален идиот како Драган Ѓилас“.
Тој рече дека „Младите на СНС мирно стоеле на улица и лепеле плакати, додека Ѓилас бил цел“.
Двајцата веднаш почнаа да ги напаѓаат младите“, рече Петровиќ и додаде дека Ѓилас прв го удрил.
Тој вели дека на Ѓилас „не му се допаднало колку биле убави постерите“.
Мислеа дека нашата младина ќе се исплаши и ќе побегне од насилниците на Ѓилас, но нема“, рече Петровиќ и додаде дека „се гордее со младите кои синоќа беа со него“.
А еве како е пласирана таа вест во дел од македонските медиуми
Дел од македонските медиуми ја пренесоа веста од прорежимските српски медиуми во кои пишуваат дека лидерот на Партијата на слободата и правдата, Драган Ѓилас, кој претходно беше пријавен од сопругата за насилство, со своето обезбедување ги нападна „мирните активисти“ на СНС кои лепеле плакати против него во Белград.
Драган Ѓилас беше министер во Владата на Србија, градоначалник на Белград и претседател на Кошаркарскиот сојуз на Србија.
Поголемиот дел од неговата политичка кариера беше член на Демократската партија, од која замина во 2016 година, за да ја формира Партијата на слободата и правдата во 2019 година.
ССП има 12 места во српскиот парламент и, заедно со другите опозициски партии, силно ги критикува потезите на владејачката Српска напредна партија.
Д. Муратов во соработка со ЦДМТ
