Поминаа пет месеци од локалните избори, а Советот на Општина Тетово сѐ уште е блокиран. Членовите на Советот не можат да изберат претседател и да формираат мнозинство. Општината не може нормално да работи. Сите ветени и планирани проекти стојат во место. Наталожените проблеми во градот не се решаваат, а граѓанките и граѓаните се револтирани.
Молк од надлежните
ЦИВИЛ Медиа побара одговор од кабинетот на градоначалничката Теута Арифи, а од таму не упатија во Канцеларијата за односи со јавност која на нашите уредно поставени писмени прашања не дадоа никаков одговор.
Бобан Видоески, претседател на Општинскиот огранок на СДСМ во Тетово изјави дека е загрижен за состојбите во Советот, но со нивното скромно учество од тројца советници не се во можност да ја деблокираат работата на Советот иако чувствуваат одговорност за состојбите, затоа што на изборите директно ја подржаа кандидатурата на кандидатот на ДУИ, Теута Арифи.
Видоески рече дека СДСМ не ја исклучуваат можноста доколку во скоро време не се најде решение да се оди повторно на избори за Совет на Општината.
Можни сценарија
Првото и најпосакувано можно сценарио е сепак партиите да ги надминат своите тесно партиски и лични интереси, велат тетовчани во разговор со ЦИВИЛ Медиа, и во име на заедничките интереси на сите граѓанки и граѓани на Тетово да најдат решение кое ќе го деблокира Советот и ќе почнат да ги решаваат проблемите на Општината за што ја добиле довербата.
Второ сценарио за кое се зборува меѓу граѓаните во Тетово, исто така, е најавеното проширување на парламентарното мнозинство да се преслика и на локално ниво во Тетово, со што дел од партиите кои ќе станат дел од владиното мнозинство да дадат поддршка да се формира мнозинство во Советот.
Трето и најнепосакувано сценарио е да се повторат локалните избори за Совет на Општина Тетово. Ова сценарио, велат тетовчани, за Тетово ќе значи само непотребно трошење на пари и губење на драгоцено време и не нуди никаква гаранција дека нешто ќе се промени во распределба на партиските влијанија.
Заклучок
Иако не се знае точниот износ, сепак јавна тајна е дека Општина Тетово е една од најзадолжените општини. Владата најави дека ќе се задолжи за да ги исплати долговите на општините. Ако ова се реализира за Општина Тетово треба да биде голем поттик за брзо решавање на наталожените проблеми и реализирање на ветените проекти.
Граѓаните сметаат дека тоа е мотив плус да се надминат партиските поделби и сите да работаат во интерес на градот и граѓаните.
Перо Наумовски
