„Од вкупно предвидени 73 мерки, во делот три од Планот 3-6-9, досега се реализирани 34 мерки, што претставува реализација од близу половина од мерките. Преку 30 мерки се во тек, а за неколку, веќе имаме констатирано дека доцнат. Тоа и не е така лошо, ако се има предвид дека се наоѓаме на половина од предвиденото време, но исто така, ова треба да претставува и предупредување за поголем фокус, како на Владата, така и на администрацијата кон имплементација на мерките од Планот 3-6-9“, истакна заменик-премиерот, задолжен за европски прашања, Бујар Османи, на денешниот 36 состанок на Работниот комитет за европски интеграции (РКЕИ).
Покрај Османи кој е претседател и на РКЕИ, на состанокот на Kомитетот што се одржал по неколкугодишна пауза, присуствувале и државните секретари на министерствата, претседавачите на поткомитетите, раководителите на работните групи, Генералниот секретар на Владата, и дел од администрацијата на Секретаријатот за европски прашања.
Пред присутните, Османи ја потенцирал одговорноста на улогата на членовите на РКЕИ за фокусот врз предложените реформи и најавил дека во интерес на подобра координација и управување со процесот на европските интеграции, состанок на РКЕИ ќе се одржува најмалку еднаш во два месеца, или и почесто. Османи најавил и реактивирање на Поткомитетот на РКЕИ, кој ја следи легислативната агенда на Владата за сите акти кои се поврзани со процесот на европска интеграција, како и на сите работни групи кои ги покриваат 33-те поглавја на европското право, во кои членуваат околу 800 административни службеници.
„Ние како Влада, на пример, имаме реализирано преку десет мерки, како што е одлуката за стопирање со владините реклами во медиумите, како и одлуката за формирање на Совет за спроведување на реформите во правосудството. Сепак, доцниме со мерките за спречување на користењето на државните ресурси за време на изборниот период, нешто што според Планот досега требаше да биде реализирано, а секако и изборите се ближат“, истакна Османи.
Османи го потенцирал и доцнењето на Собранието, каде не е започната инклузивна дискусија за избор на модел за реформа на системот за следење на комуникациите, и избор на член на Уставниот суд кому му престанува мандатот.
