Прославата на труската амбасада и присуството на претставници на Владата по повод годишнината од крвавите настани во Турција, ја осуди и Левица, која во своето соопштение нагласи дека не смее да се дозволи туѓа пропаганда и удар на демократијата на сопствено тло.
„Левица најостро го осудува присуството на владини претставници на пропагандниот настан организиран од турскиот режим, во Скопје, по повод годишнината од државниот удар во Турција. Воедно, Левица изразува чудење со колкава леснотија новата Влада заборави на важноста на борбата за демократија, борба преку која таа дојде на власт. Многу лесно е да се игнорира борбата на другите за слобода, многу лесно е да се коленичи пред моќник кој ја гази демократијата. Многу е лесно, но е далеку од исправно! Принципите не смеат да служат како помошно средство некој да се докопа до власта. Принципите мора да бидат водилка во политичкото делување! Доста ни е од дволичност во политиката!
Недозволиво е една суверена земја да дозволува туѓа пропаганда на сопствена територија! Македонските градови беа преплавени со билборди преку кои се искривува вистината, преку кои се тврди дека демократијата победила во Турција. За потсетување, по контроверзниот државен удар, Ердогановиот режим спроведе масовна чистка на неистомислениците, при што 150.000 луѓе ја изгубија својата работа, а 50.000 завршија во затвор. Така ли ‘победува’ демократијата?! Левица најостро го осудува немањето никакви стандарди во трката за профит на газдите што стопанисуваат со билбордите и локалните власти кои им овозможуваат на овие газди – за профит да бидат мегафони на пропаганда на друга држава.
Левица ја изразува својата поддршка на сите борци на слобода и социјална правда во Турција, особено на оние што гнијат во Ердогановите затвори. И им посакуваме успех во борбата против авторитарниот режим. Груевски не беше вечен, нема да биде ниту Ердоган!“, стои во соопштението на Левица.
