Почнувањето со изградба на експресниот пат Штип – Радовиш е можеби вест на денот, но во фокусот на јавноста остана присуството на премиерот Зоран Заев при увид на почетокот на градежните работи на патот и неговите изјави за текот на преговорите со името и најавениот протест на опозицијата во 20 часот вечерва.
Заев потврди дека сè уште не контактирал со Алексис Ципрас и дека не сака да зборува сè додека не се прецизираат сите детали околу решение на конечниот предлог за името на државата. Со оглед дека се шпекулира за Република Северна Македонија, па медиумите го искористија присуството на премиерот на увидот на изградба на експресниот пат да прашаат и за прифатливоста на овој предлог и зошто најголемиот дел од информациите за преговорите доаѓаат од грчки медиуми.
Заев одговори дека самиот процес на прeговорите е чувствителен и дека не би шпекулирал до разговорот со Ципрас, а до остварување на тој телефонски разговор ќе дојде откако ќе се помине целата материја на која работат повеќе луѓе.
За вечерашниот протест на опозицијата, Заев кратко истакна дека имаат право да протестираат и дека ќе ги слушне нивните пораки.
ВМРО-ДПМНЕ го најави протестот пред Владата напоредно со лидерската средба, по остварената средба Заев-Ципрас во Софија на 17 мај.
Во денешното соопштение тие повикаа уште еднаш на протест вечерва во 20 часот и тоа против „криминалот и корупцијата на власта, против аматеризмот во водењето на државата и расфрлањето со државните интереси“.
Од СДСМ потсетија, чисто информативно за граѓаните, во пресрет на протестот, дека Христијан Мицкоски, наследникот на Никола Груевски досега ниту еднаш не се оградил од криминалните политики на неговиот претходник, досега не се извинил на граѓаните за пустошот во економијата, за нивното 11 годишно осиромашување, за поделбите и кризите кои како наследство им ги остави ВМРО-ДПМНЕ и дека очигледно не поседува капацитет вистински да ја рефомира партијата и да ја надмине матрицата на Никола Груевски.
„Со таквото однесување, ВМРО-ДПМНЕ останува на браникот на криминалот на Груевски и фамилијата наместо да понуди реални политики во интерес на граѓаните и да се вклучи во реформскиот процес“, стои во денешното сооптение на вјадејачката партија.
А по жешки, целовечерни, вербални пресметки, конечно вчера се реконструираше Владата на Република Македонија. Собранието избра четворица нови министри во Владата. За нова министерка за правда е избрана Рената Дескоска, за министер за образование и наука Арбр Адеми, за култура Асаф Адеми и за министер без ресор Бардил Даути.
Останува да се проследи протестот на опозицијата, да се пребројат истомислениците, по чиј број ќе се одлучува за неговата успешност, да се пренесат пораките, да се слушнат одговорите на Заев и ако треба да се реагира.
Во меѓувреме сообраќајот уште сега е затворен пред Влада. Од 20 часот за сообраќајот ќе се затврои и мостот „Гоце Делчев“, а за јавните градски превозници останува на располагање улицата „Димитрија Чуповски“ на „Рекорд“ во двете насоки.
Биљана Јордановска
