„Аудио и видео записите, кои законски имаат право да ги побараат засегнатите страни во случајот, се непобитен доказ дека тоа што е наведено во записникот од првото рочиште за насилството во Општина Центар, за кое се гони поранешниот премиер Никола Груевски, не ја претставува реалната ситуација, односно дека се работи за фалсификуван записник“. Ова е ставот на обвинителките од СЈО Катица Јанева и Фатиме Фетаи.
На денешното, второ рочиште за случајот „Насилство во Општина Центар“ во кој е обвинет лидерот на ВМРО-ДПМНЕ Никола Груевски, обвинителките Јанева и Фетаи беа казнети со по 2.000 евра, откако ја обвинија судијката Татјана Михајлова, дека направила фалсификат на записникот од минатото рочиште.
„Во делот на исклучување на јавноста, судијата направил интелектуален фалсификат и дел од новинарите кои бевте присутни на првото рочиште, знаете дека кога јас се произнесов по однос на употребливоста на материјалите од прислушуваните разговори, новинарите беа исклучени. Кога се вративте, судијата на тивок глас прочита што беше кажано. Во записникот е наведена обратна ситуација, дека јас сум се произнела во присуство на јавноста и пред одбраната на обвинетиот и дека јавноста била исклучена единствено кога се слушале аудио снимките, што не е точно. Има и други работи кои се невистинито внесени во записникот, затоа ја бараме снимката од судењето на која имаме право, согласно одредбата од член 374 од Законот за кривична постапка, во рок од 24 часа, а од 16-ти декември до денеска е поминат подолг временски период. За ваквиот интелектуален фалсификат кој е направен од судијата, има предвидена соодветна кривична норма која го санкционира ова поведение, а предвидени се и други постапки, за кои ќе информираме дополнително“, изјави Фатиме Фетаи.
„Фактичката состојба не соодветствува со записникот кој ни е доставен, а имаме право на аудио и видео снимка која не ни е доставена. Подготвуваме пријавата, само не знаеме зошто предметот ќе го праќаат во Советот на јавни обвинители, тоа е смешно. Прво треба да го пратат во Судскиот совет да се произнесат за нејзината работа, а потоа за нашата. Ние ќе го известиме Советот за оваа работа и ќе се жалиме. Апелациониот суд не може да ни ја одземе надлежноста, затоа што ние имаме снимки, а ако продолжат со такво однесување и ние имаме механизми“, истакна Специјалната јавна обвинителка Катица Јанева.
По рочиштето, обвинетиот Груевски изјави дека „ова не е судење, туку театар“, и веднаш си замина.
На лидерот на ВМРО-ДПМНЕ му се суди за поттикнување на насилство и нарачување на шлаканици за градоначалникот на Општина Центар, Андреј Жерновски. Обвинети се и поранешниот министер за транспорт и врски Миле Јанакиески, пратеничката од ВМРО-ДПМНЕ Даниела Рангелова и уште 11 други лица.
Судењето е одложено за 10 март.