Енергетнската трансформација кон обновливи извори, енергетската ефикасност, земјоделието, во насока на мерките за адаптација од климатски промени, проблемите како што е загадувањето на воздухот, водите, железничката инфракструтура, се само дел од приоритетите во контекст на зелената агенда кои ги наведе претседателката на ДОМ и пратеничка Маја Морачанин, на панелот на ЦИВИЛ „Македонската зелена агенда: Реалност или тешко остварлива цел?“
„Приоритет кој што е и дел од Зелената агенда е и транспортот, железничкиот сообраќај, како најеколошки. Ние ништо со години не сме направиле, три децении, за железницата. Па нели е тоа поразително? Сега има средства за тоа и нека се реализира. Навистина е поразително да не можете со воз да патувате од точка А до точка Б – 21 век“, заклучи Морачанин.
Екологистот и политиколог, Тони Поповски, потенцираше дека имаме критична ситуација со секторот со општински јавни комунални претпријатија, кој и пред енергетската криза, како последица на руската агресија врз Украина, беа во една незавидна финансиска состојба.
„Со енергетската криза уште потешко им е да работат. Формациски има некој пинг – понг меѓу министерствата, никој не сака да се зафати со овој жежок костен и да го реши со една национална политика. Ние не смееме да дозволиме да имаме вакви комунални претпријатија пред колапс кои нема да можат да ни испораачат елементарни услуги, како што е водата за пиење“, заклучи Поповски.
Заедничкиот заклучок е дека мора да се зајакнат институционалните капацитети. И Морачанин и Поповски истакнаа иако по прашањето на зелената агенда има прогрес, сепак треба да се сфати дека таа нема друга алтернатива и треба да котира високо во политичката агенда на Владата и Собранието со одвојување на значајни финансиски средства.
Панелот се пренесува во живо на Фејсбук страницата на Зелен ЦИВИЛ и на Јутуб каналот на ЦИВИЛ.
Панел –дискусијата е дел од проектот „Зелен форум“ што Зелен ЦИВИЛ го спроведува во соработка со Фондацијата Хајнрих Бел.
Б. Јордановска
камера: Дехран Муратов
монтажа: Аријан Мехмети
