Агенцијата за електронски комуникации нема да донира пари на сметка на Јавното собраќајно претпријатие „Скопје“ за изградба на Панорамското тркало! Граѓан(к)ите во повеќе наврати го изразија незадоволство од трошењето на енормната сума од 18 милиони ерва за изградбата на Панорамското тркало, особено поради тоа што Скопје се соочува со голем број посуштински проблеми.
Прашањето за логиката на градење на прескапото тркало беше покренато за време на поплавите кои го зафатија главниот град и кога животот го загубија 22 лица, а беше предизвикана и голема материјална штета.
„Агенцијата со предлог измените на Годишниот финансиски план на АЕК за 2017 година, а поради потребата од пренамена на средства поради новоутврдени потреби, како и распределбата на вишокот од претходната година, согласно член 29 став 8 од Законот за електронските комуникации, во ставката донации нема предвидено средства, па измената ја стави на јавна расправа и истата е објавена на нашата веб-страница“, соопштуваат од АЕК.
ЈСП како инвеститор е обврзано да го изгради Панорамското тркало, меѓутоа, останува отворено прашањето – од каде ќе најдат средства, односно донации, бидејќи финансиерот АЕК годинава нема да го финансира проектот и средствата ќе ги пренамени?
Градоначалникот на Скопје, Коце Трајановски вели дека надлежноста е во рацете на ЈСП. Но, одлуката за изградба на тркалото ја донесе Градот Скопје, уште во 2014 година.
Во меѓувреме, илјадници граѓани се потпишаа на онлајн петиција за стопирање на градбата и таа беше поднесена и до Град Скопје и до Владата, но ни тоа досега. не успеа да ја спречи изградбата на Панорамското тркало. И бројни жители на Скопје кое е на врвот на листата на најзагадени градови во Европа, кои се „осудени“ да го дишат загадениот воздух, пред камерата на ЦИВИЛ Медиа апелираа дека парите предвидени за изградба на Панорамското тркало, треба да се пренаменат.
Според објавените информации, во рамките на објавената петиција, првичните проценки беа дека Панорамското тркало ќе чини 12 милиони евра, но тоа, уште неизградено, според склучените договори, веќе чини над 18 милиони евра!? Рокот за изградба е пет години. Панорамско тркало треба да има дијаметар од 57 метри, а целиот објект ќе се издигне 73 метри над брегот на Вардар.
Дехран Муратов
Фото: Вулнет Махмути
