Иран уапси десетици луѓе под сомнение за шпионажа, додека расте стравот во Исламската Република поради степенот на инфилтрација од страна на израелската разузнавачка служба Мосад, пренесува Си-ен-ен.
Откако започнаа израелските напади во петокот, 28 лица во главниот град беа уапсени и обвинети за шпионажа за Израел, додека во понеделник, еден човек уапсен по тоа обвинение пред две години беше обесен, што се чинеше дека е порака до секој потенцијален соработник.
Иранскиот режим, исто така, уапси стотина луѓе низ целата земја за наводно споделување статии на интернет „во поддршка на ционистичкиот режим“ – обвинувајќи ги за нарушување на „психолошката безбедност на општеството“ – вклучувајќи 60 лица во Исфахан, каде што Израел тврди дека таргетирал нуклеарна централа.
Бранот апсења доаѓа додека Техеран се тресе од откритието дека оперативците на Мосад шверцувале оружје во Иран пред невидениот напад на Израел и го користеле за да ја таргетираат земјата одвнатре.
Иранските сомневања оттогаш станаа толку зголемени што Министерството за разузнавање бара од јавноста да пријави сомнителни активности и издава упатства за тоа како да се препознаат соработниците.
Едно соопштение од министерството ги повикува луѓето да бидат претпазливи кон странци кои носат маски или очила, возат пикап камиони и носат големи торби или снимаат околу воени, индустриски или станбени области.
На друго место, постер објавен од државниот Nour News – кој е близок до безбедносниот апарат на Иран – ги издвои како сомнителни луѓето кои носат „маски, капи и очила за сонце, дури и ноќе“ и оние кои добиваат „чести испораки на пакети преку курир“.
Постерот ги замолува луѓето да пријават „необични звуци од внатрешноста на куќата, како што се врескање, звук на метална опрема, континуирано тропање“ и „куќи со спуштени завеси дури и преку ден“.
Друг постер, кој ѝ се припишува на полицијата и објавен во државните медиуми, им советува на сопствениците кои неодамна ги изнајмиле своите домови веднаш да ја известат полицијата.
Во меѓувреме, новинарите во Иран изјавија за CNN дека им е забрането да фотографираат на улица.
Стравовите од израелска пенетрација само ги засилуваат вознемиреностите што ги чувствува сè поизолираното раководство на Исламската Република, кое во последните години е потресено од антирежимски протести предизвикани од смртта на млада жена во притвор на таканаречената морална полиција на земјата.
Истата сила што се користеше за сузбивање на тие протести, Басиџ (параволитарно крило на Иранската револуционерна гарда) е распоредена во ноќни патроли за да се зголеми „надзорот“ по израелската инфилтрација, според државното контролирани медиуми во Иран.
Во видео изјава во понеделник, началникот на иранската полиција Ахмад-Реза Радан ги повика „предавниците“ да се јават, сугерирајќи дека оние што сфатиле дека биле „измамени од непријателот“ може да добијат поблаг третман и да бидат „почестени“ од Иран – додека оние што биле фатени ќе бидат „научени на лекцијата што сега му се дава на ционистичкиот непријател“.
Шефот на иранското судство, Голам-Хосеин Мохсени-Еџеи, повика на „брзо“ казнување на обвинетите за соработка со Израел.
„Да речеме дека сме уапсиле некого кој соработува со (Израел), ова прашање во овие воени услови… мора брзо да се гони и казни“, рече тој.
Растечката параноја на иранскиот режим доаѓа во време кога се појавуваат повеќе детали за операцијата на Мосад, која шверцуваше оружје во Иран пред првите напади во петокот.
Според израелските власти, оперативците воспоставиле база за лансирање експлозивни дронови во Иран, а потоа ги користеле тие дронови за таргетирање на ракетни лансери во близина на Техеран.
Прецизно оружје било шверцувано, велат тие, и било користено за таргетирање на ракетни системи земја-воздух, отворајќи го патот за израелските воздухопловни сили да извршат повеќе од 100 напади со над 200 авиони во раните часови на петокот по локално време.
Разузнавачките информации собрани од Мосад во Иран, исто така, наводно им дале на израелските воздухопловни сили можност да таргетираат високи ирански команданти и научници.
Оттогаш, според иранските медиуми, владата запленила опрема за која се тврди дека е користена за време на израелската операција – вклучувајќи 200 килограми експлозиви, неколку самоубиствени дронови, лансери и опрема што се користи за производство на дроновите – во градот Реј во покраината Техеран.
Д. Мишев
