Пристигнато е ново барање од украинска страна, за дополнителна воена помош, класифицирано е и во моментов Генералштабот го разгледува, соопшти денеска министерката за одбрана Славјанка Петровска, одговорајќи на новинарски прашања по завршувањето на брифингот по повод отпочнување на активности мултинационалната вежба „Брз одговор 23“.
– Минатата недела, мислам, пристигнато е ново барање, се разбира тоа е класифицирано од украинската страна се разгледува во Генералштабот на армијата, дали можеме и во која мера да одговориме и ако добиеме позитивно мислење се разбира соодветно ќе ја известиме јавноста доколку Владата донесе дополнителна одлука. Сега во моментов, како што напоменав, се прави анализа, а се разбира ние сме отворени сè додека има потреба од поддршка Република Северна Македонија, да пружи поддршка, изјави министерката.
Петровска повтори дека барањето е класифицирано, напоменувајќи дека одлуките кои веќе се донесени се декласифицирани и ѝ се достапни на јавноста.
– Се однесуваат повеќе барања како што реков тие се класифицирани не би ги споделувала во детали. Она што досега го испорачавме и одлуките кои ги донесовме досега тие веќе ги декласифициравме како што објавив, мислам дека веќе е објавено и на сајтот на Министерството, каде што само е задржано само правото да не ги споменуваме, да не ги споделуваме количините, тоа е заради тоа што сепак, станува збор за оперативни информации. Меѓутоа видот во смисла на тоа каков вид подетално на оружје, вооружување веќе сме донирале е објавено, изјави министерката за одбрана Петровска.
Набавката на возилата од САД за Армијата се спроведува согласно диманичниот план, пристигнати се на пристаништето во Солун и ќе бидат испорачани во касарната во Штип, информираше денеска министерката за одбрана Славјанка Петровска, одговорајќи на новинарски прашања по завршувањето на брифингот по повод отпочнувањето на активностите за мултинационалната вежба „Брз одговор 23“.
– Набавката на возилата од САД се одвива согласно планот, имаше некое мало одложување на испораката, меѓутоа тие се веќе пристигнати, 26 чинам возила се наоѓаат на пристаништето на Солун и во наредните денови треба да започне испораката кон Република Северна Македонија. Истите ќе бидат пренесени во касарната во Штип каде се наоѓа Баталјонот со којшто практично тие ќе бидат опремувани и се разбира во текот на годината ќе следува и друга испорака. Таа е повеќегодишна, како што е со динамичниот план предвидено, а тоа е во неколку години последователно да бидат испорачувани, изјави министерката Петровска.
Таа најави дека штом ќе пристигнат, во текот на јуни годинава, јавноста, медиумите ќе имаат можност да ги видат, дополнувајќи дека се исти како претходните добиени минатата година.