Еден од клучните промени за новите наставни програми и планови за првото одделение, според Министерството за образование, предвидува на секој час од 40 минути, да има 15 минути одмор за децата, намалување на учењето во широчина за сметка на учењето во длабочина.
Според министерката за образование Рената Дескоска, новите реформи во основното образование предвидува нов и квалитетен образовен модел, кој е автентичен и соодветствува на нашето подрачје.
Новите реформи предвидуваат намалување на тестирањата на учениците за сметка на комплексното проверување на резултатите од учењето, домашните работи се заменуваат со вежби на час под контрола на наставникот, бројот на часови ќе се намали – учениците во прво одделение нема да имаат повеќе од 4 часови дневно, првото одделение ќе биде соодветно прилагодено на возраста на учениците од 5 ипол години и намалување на времето планирано за меморирање за сметка на времето планирано за истражување и проблемско учење.
„Сите анализи кои беа направени покажаа дека практично учениците се една од најоптеретените категории. Ако сите ние имаме лимитирано работно време, учениците имаат време кое што го поминуваат досега на часови, а потоа нивните обврски продолжуваа и дома, и тоа резултираше во еден вид на незаинтересираност, презаситеност на учениците, одбивност од наставниот процес, така што сакаме со реформите да им дадеме на учениците знаења, и исто така да ги вратиме интересот и желбата за учење“ изјави министерката за образование и наука, Рената Дескоска.
Според професорот Зоран Велковски, основниот принцип при ревизијата на наставните планови и програми бил со помалку да се постигне повеќе, наспроти оној поранешниот принцип на пренатрупување.
„Посебен акцент да ставиме на периодот од прво до трето одделение, каде што секое дете ќе ги стекне фундаметалните знаења, за да може успешно да напредува понатаму низ образовниот процес. Во тој контекст за учениците од прво до трето одделение, предвидени се часови за инструкција, меѓутоа зголемени се одморите“, изјави Велковски.
Ангела Петровска