Сигурни во својата победа СДСМ не чекаа многу да продолжат со својата кампања, онаму каде застанаа. Нормално, со фокусот насочен кон 18 општини каде пред сѐ опоненти им се кандидатите за градоначалници на ВМРО-ДМНЕ. Не дека останатите не им се битни, ама ако главнината ја освојат, многу ли е за очекување дека во духот на транспарентноста и солидарноста, останатите ќе ги препуштат на ДУИ, Сојузот на Ромите на Македонија и независниот кандидат за градоначалник на Могила, Стево Пивковски.
Но, дека изборите беа сјајни, кристално чисти, не беа, меѓутоа појасно од бел ден беше чија ќе биде круната.
ВМРО-ДПМНЕ со последни сили, на антидепресиви, се обидува со тужби, жалби, молби, кукање и манијакално однесување да докаже дека изборите биле чист криминал на СДСМ, заедно со ДИК, со меѓународната заедница, странските служби, соросоидите, граѓанките и граѓаните што гласале спротивно од нивното убедување дека ВМРО-ДПМНЕ се најдобра опција во ерата што престои.
И додека во албанскиот блок се демантираат едни со други, се здружуваат, па се разотидуваат, ДУИ дефинитивно ветува дека на 29 октомври победата ќе биде нивна во сите 8 општини каде што имаат свој кандидат за градоначалник. Најголем противник им се Беса, ама како поискусни можат само да им „опалат по една“ за да се научат на ред.
Но, ниту СДСМ не се толку наивни, па од централно официјализирана поддршка и соработка со ВМРО-НП, на локално ниво практично ја применија во Штип, како доволна разлика за победа на Благој Бочварски.
И од многу „паметен“, Илчо во очај да ја задржи удобната фотелја, избрзано асфалтира улица, една од оние калливите. Доволно брзо да добие кривична пријава, за така фин и убав гест.
СДСМ со слободарски речник, истите фрази и победнички манир продолжи да ги потхранува душичките на оние што останаа во вториот круг, со централистички говори прилагодени за локални проблеми.
Ништо ново на запад, исток, север и југ, што би се рекло црвено си е црвено, живот ли е, ера ли е, граѓанки и граѓани или бројки и статистики.
Важно е да се победи и важно е да се знае кој треба да победи.
Целта ги оправдува средствата?!
А во меѓувреме, тоа што во вашата општина нема втор круг на гласање, не значи дека не треба да дадете свој придонес во кампањата, и на едните и на другите и на останатите, па ако не на друго место, на Фејсбук сигурно имате пријатели од Кратово, Старо Нагоричане, Чешиново-Облешево, Пробиштип…
Биљана Јордановска