Франција забрани продажба, поседување и транспорт на пиротехнички средства за време на националниот празник на 14 јули – Денот на Бастилја, по немирите предизвикани од смртта на тинејџерот кој беше застрелан од полицаец, соопшти Владата во Париз.
Пиротехниката беше користена како оружје за време на немирите што избувнаа во Франција откако полицаец застрела и уби 17-годишно момче за време на сообраќајна контрола во близина на Париз на 27 јуни, што повторно ги разгоре долгогодишните фрустрации и обвинувањата за системски расизам во француските безбедносни сили, пишува Франс 24.
Со цел да се спречи ризикот од сериозно нарушување на јавниот ред за време на прославата на 14 јули, продажбата, поседувањето, транспортот и употребата на пиротехнички средства се забранети до 15 јули, се наведува во владиниот декрет објавен во службениот весник Le Journal du Dimanche, додавајќи дека „забраната не се однесува на професионалци или општини кои организираат традиционален огномет за одбележувањето на Денот на Бастилја“.
Загрижена поради евентуални нови немири, премиерката Елизабет Борне изјави денеска за весникот Le Parisien дека Владата ќе распореди „огромни ресурси за да ги заштити Французите“ за време на националниот празник.
Огнометот е вообичаен за време на прославата на Денот на Бастилја. За време на протестите во земјата често се користат и пиротехнички средства.
Полициското убиство на алжирскиот тинејџер Нахел М. во париското предградие Нантер го предизвика најголемото урбано насилство во земјата од 2005 година.
Повеќе од 3.700 луѓе се приведени во полиција во врска со протестите по смртта на Нахел, меѓу кои најмалку 1.160 малолетници, според официјалните податоци.
Г. Т.
