Американскиот конгресмен, републиканецот Кристофер Смит најавил истрага за улогата на американската амбасада во Македонија и го повикал новоименуваниот државен секретар Рекс Тилерсон да го разреши амбасадорот Џес Бејли, објавија денеска провладините медиуми во Македонија.
ЦИВИЛ Медиа, побара одговор од Амбасадата на САД, во врска со објавената вест, во која амбасадорот Бејли и Амбасадата во Скопје се обвинети дека работат во полза на политички партии и финансираат проекти на фондацијата на Џорџ Сорос во Македонија.
„Ги поздравуваме прашањата од Конгресот и можностa да обезбедимe информации за нашите активности и контекстот во кој ние работиме за да ги оствариме нашите цели. Ние сме подготвени да одговориме на ова барање, како што од нас се бара“, се вели во одговорот на Амбасадата во САД.
Провладините медиуми ја објавија и изјавата на конгресменот Смит во која се вели дека барањето има поддршка од шест конгресмени..
„Американскиот амбасадор не смее да има улога во формирањето влада и да зазема страна при формирањето на коалиција. Тоа не е работа на САД и на нејзините претставници во Скопје. Ние, група конгресмени, поставивме специфични прашања во ова писмо, дали имало или не некаква соработка со централно левичарските партии кога изборите треба да се одржат. Не треба да имаме улога во тоа! Треба да зборуваме за слободни и фер избори, еднаков пристап до медиумите, но никако да заземаме страни. Овој амбасадор заземал страни и треба да биде отпуштен! Отпуштен веднаш!’’, изјавил Смит.
По менување на администрацијата на САД, со доаѓање на новиот американски претседател Доналд Трамп, се шпекулираше дека амбасадорите на САД на Западен Балкан, ќе бидат променети. Сепак, како што ЦИВИЛ Медиа објави, факт е дека сите актуелни дипломати на САД во земјите од Западен Балкан не се поврзани ниту со старата, ниту со новата администрација на САД. Сите овие амбасадори се именувани од Сенатот на САД кон крајот на 2014 година, а ги заземале своите позиции на почетокот на 2015 година. Бидејќи повеќето дипломати служат мандат од околу три години, редовните кадровски промени во земјите од Западен Балкан може да се очекуваат на крајот од оваа или почетокот на идната година. Тоа значи дека до крајот на 2017та година, амбасадорот Џејс Бејли, останува на позицијата амбасадор на САД во Македонија
