Деновиве не можеш да седнеш со некого на маса а да не се постави прашањето за претстојниот референдум како тема со десетици потпрашања и можни разврски. Од тоа дали ќе има доволна излезност, дали ќе има масовен тивок бојкот, каква ќе биде кампањата, каков ќе биде резултатот, дали воопшто ќе се земе предвид резултатот, до тоа што после референдумот.
Постојат различни мислења, ставови и прогнози. Некои се скептични а други оптимистички, додека реалноста е секогаш помеѓу.
Се потсетив скоро на еден цитат кој бил напишан пред педесет години, каде се вели: “Секој народ, пред да бил повикан да ја изврши својата улога во историјата, морал да доживее период на внатрешно прочистување и на практично прифаќање на некои темелни морални ставови.”
И еве сме сега ние пред таа историска одлука, втор пат во историјата прашани за едно така битно прашање за нашата земја, каде треба емоциите да протекнат од разумот, а не да го потиснат. Дали 27те години политичка и безбедносна нестабилност, економско уназадување, транзиција, корупција, меѓуетнички тензии, дискриминации и непочитување на човекови права, 11-те години режим и што сè не, се доволен период да сфатиме што не сакаме и каде сакаме нашата земја да се насочи во иднина? Дали за 27 години сме ја научиле лекцијата? Дали резултатите на локалните избори се некаков показател за тоа што да очекуваме на претстојниот референдум? Дали сме му дораснати на ова прашање?
Доколку не сме созреале доволно и не го направиме вистинскиот исчекор кон евроатлантските интеграции, тогаш треба да ни биде јасно дека е прашање дали воопшто ќе ја доживееме следната прилика за поправен испит на ова прашање.
Затоа, да не бидеме од оние 97 проценти неинформирани граѓани кои би излегле да одлучуваат водени од емоциите како последица на говорите на политичарите или водени по налог на политичките партии на кои им припаѓаат. Ова прашање е премногу големо за да биде партиско. Ова прашање е премногу големо за да слушаме туѓи мислења без да се информираме самите, без да го прочитаме преспанскиот договор и без да ја сфатиме суштината на референдумското прашање. Ова е прашање од национален интерес кое ќе им ја одреди иднината на нашите деца. А иднината на нашите деца не е ништо друго освен економскиот и образовен просперитет и рамноправноста со другите народи во ЕУ, и безбедноста во рамките на НАТО.
Иако времето за кампањата е кратко, а европските вредности се градат постепено, темелно и долго, а не се стекнуваат за едно лето, она што е најважно во моментот е првиот чекор кој ќе ја покаже страната, правецот кон кој државата и граѓаните ќе продолжат да се движат.
И секако, на крајот на септември, и да одлучиме исправно, промените нема да дојдат преку ноќ, зашто не постојат чуда, освен оние кои луѓето ги создаваат со труд, знаење и одговорност, по примерот на оние кон кои стремиме да им се придружиме.
Услови за користење, авторски права и заштита на приватноста
Преземање на содржините под различни услови од наведените не е дозволено, освен со писмена дозвола од ЦИВИЛ. Повредата на авторските права е забранета со закон.