Втор ден од изборната кампања, со разни ветувања: за бесплатен градски превоз во Скопје, бесплатно овошје за сите средношколци, борба со урбаната мафија… Продолжува политичка злоупотреба на деца во изборна кампања. ЦИВИЛ со став за најавите за можни предвремени избори: Тие се шок за системот. И скапи се. Затоа, силна препорака на ЦИВИЛ е изборните процеси да се одржуваат во редовните термини.
ЦИВИЛ е секогаш подготвен за избори, но тоа не значи дека сме ние нешто претерано добри, туку дека во земјава речиси секоја година има избори, па едноставно кога ќе заврши едниот изборен процес, ние веќе се спремаме за наредниот, истакна Џабир Дерала во денешното гостување во „Утрински брифинг“, на „Слободен печат“.
Став за најавите за можни предвремени парламентарни избори
Предвремените избори се шок за системот. Тие дополнително го поларизираат општеството и штетно влијаат на бизнисот и економијата. Изборите ја одложуваат, а неретко и ја прекинуваат имплементацијата на важни процеси и проекти. И скапи се. Затоа, силна препорака на ЦИВИЛ е изборните процеси да се одржуваат во нивните редовни термини.
Повиците за предвремени избори се интензивни, што веројатно е директниот повод за отворање на дискусијата за предвремени парламентарни избори. Барањата на опозицијата за поединечни оставки може да се оправдани или неоправдани, но барањата за предвремени избори од опозицијата не се доволна причина за тие и да се прифатат. Владата е одговорна за нормално функционирање на државата и не е должна да ги задоволува апетитите за власт на одредени политичари.
Политичка злоупотреба на деца во изборната кампања
Мониторингот на ЦИВИЛ бележи случаи на политичка злоупотреба на деца во изборната кампања.
Со овие постапки се крши Член 12 став 4 од Законот за заштита на децата во кој се вели: „Се забранува злоупотреба на децата поради политичко и верско организирање и дејствување“. Ова, според нашите правни експерти, подразбира општа забрана за употреба на децата во било каква форма на политичко дејствување, вклучувајќи и политичка изборна кампања.
- Ахмети и Бејта со злоупотреба на деца во изборна кампања
- Кандидатот на ВМРО-ДПМНЕ за градоначалник на Кисела Вода со злоупотреба на деца во изборна кампања
- Злоупотреба на деца и државни ресурси во (пред)изборна кампања
ВМРО-ДПМНЕ ветува речиси 15 илјади проекти
Коалицијата предводена од ВМРО-ДПМНЕ ќе ја претстави изборната кампања „Создади нова иднина!“ во Вевчани, Двориште, Дебарца – с. Белчишта, Струга, и Ресен.
Лидерот на ВМРО-ДПМНЕ, Христијан Мицкоски вети проекти на развој, проекти за грижа за луѓето и за подобрување на инфраструктурата, проекти за поквалитетна животна средина, проекти кои ќе нè доближат близу до европските градови и држави.
„Вкупно програмите содржат 14.835 проекти од различни сфери и области и се решенија за реалните проблеми на народот, за таа нова иднина вреди да се бориме“, истакна Мицкоски.
СДСМ ветува дека ќе продолжи да работи како и досега
Коалицијата предводена од СДСМ ќе ја претстави изборната кампања „Најдоброто за мојата општина“ во општините Чаир, Кисела Вода и Петровец.
Од СДСМ велат дека Мицкоски може да понуди единствени 14.835 блокади и лажни вести со кои ќе им нанесува штета на граѓаните и државата, а не проекти.
„Таквиот однос кон сопствената држава, кон сопствениот народ му е рецепт за уште еден нов, седми пораз по ред на изборите“.
„Голем дел од општините во изминатите четири години беа предводени од СДСМ. Работевме посветено, вредно и напорно, и таа силна динамика мора да продолжи. Служењето на граѓаните продолжува, а победата на овие локални избори ќе биде потврда и за политиките на централно ниво“, велат од СДСМ.
ГРАД СКОПЈЕ
Бесплатен јавен превоз за сите скопјани и денеска вети кандидатката за градоначалничка на Град Скопје, Данела Арсовска, поддржана од ВМРО-ДПМНЕ, а актуелниот градоначалник и кандидат на СДСМ, Петре Шилегов, кој е во трка за втор мандат, пак, вели дека е запрепастен од евтините и популистички ветувања.
„Ако може тоа да функционира некаде, зошто не кај нас? Сведоци сме на лошо работење на ЈСП поради непродуктивни трошоци, непостоење систем за брз и ефикасен превоз. Решението за БРТ ниту е добро ниту пожелно за Скопје и со него ама баш ништо не се решава, туку само дополнително се комплицира. Ќе се преместуваат мостови, ќе се сечат дрвја по ’Партизанска’, ќе се направи гломазен нефункционален систем. Секогаш одиме по комплицираниот пат кога пред нас имаме едноставни решенија. Време е тоа да престане“, порача Арсовска ветувајќи и воведување ноќни линии посебно во викенд, како и нови автобуски линии и нови постојки.
Шилегов презентираше пакет од социјални поволности во кои има бесплатен градски превоз за одредени категории граѓани, кои во најголем дел веќе ги имаат овие поволности. Неговиот пакет за финансиска поддршка на скопјани се состои од:
„Бесплатен јавен градски превоз за сите пензионери во Скопје, секој ден во неделата, како и за лицата со ретки болести и постдипломците и докторандите кои студираат во Скопје; бесплатен медицински транспорт за лицата во трета доба и лицата со попреченост до здравствените институции во градот; 50 проценти поевтин оброк за учениците за време на престојот во училиште; 100 стипендии од 12 000 денари за најдобрите средношколци во Скопје и бесплатно овошје за сите средношколци додека се во школо; субвенции до 50 отсто за згрижување деца во државните градинки; финансиска поддршка на парови за биомедицинско потпомогнато оплодување.
Кандидат за градоначалник на Град Скопје, Ана Петровска, од Зелен хуман град вели дека решенија за проблемите на Скопје и скопјани има! Потребни се стручни и непоткупливи луѓе на чело на Град Скопје, со една единствена цел – заштита на граѓаните од урбанистичката мафија.
„Сега е крајно време да си ги зачуваме и вратиме јавните простори, да ги прошириме парковите, да ја спречиме бетонизацијата на градот. Врвен приоритет ставаме на хигиената, на олеснување на движењето на нашите граѓани и на намалување на загадувањето. Скопјани заслужуваат зелен и хуман град“, вели таа.
ЛОКАЛНИ ИЗБОРИ:
– Демократската Унија за Интеграција изборната кампања ја продолжува во Тетово.
– Движењето „Одлучно за промени“ предводена од ДОМ и ЛДП, ќе се претстави во Берово и Виница.
Д. Муратов
