ВЕСТ НА ДЕНОТ: Усвоен планот за борба против корупција „Акција 21“
Со овој акциски план ќе се спречи корупцијата на Владата и ќе се расчисти со коруптивните остатоци од минатиот режим, рекоа денеска премиерот Зоран Заев и вицепремиерот Љупчо Николовски, на презентацијата на акцискиот план за борба против корупцијата.
„Го усвоивме планот за борба против корупцијата наречен ‘Акција 21’. Првите два приоритети се борба прочистување на правосудството и борбата против корупцијата, а планот е производ на политичката волја како Влада да се избориме против корупцијата“, рече премиерот Заев.
Заев и Николовски истакнаа дека планот ги содржи сите забелешки, препораки и барања на невладините организации, на Граѓанската платформа за борба против корупцијата, на „Транспаренси“, на Државната комисија за спречување на корупцијата, на регулаторните тела и сите забелешки и препораки од стратешкиот партнер-САД, Извештајот на ЕК, и од сите релевантни институции кои ја следат состојбата во државата.
ИЗЈАВА НА ДЕНОТ: Морачанин: Како пратеници од зелената партија ДОМ во Собранието ќе дејствуваме како независни пратеници.
Во контекст на „осомостојувањето“ на помалите политички партии со свои независни пратеници во Собранието, ЦИВИЛ Медиа ја праша претседателката на ДОМ, воедно и пратеничка во Собранието, Маја Морачанин, што значи да се биде независен, а да се остане дел од Коалицијата „Можеме“, односно за што точно се работи.
„Како пратеници од зелената партија ДОМ во Собранието ќе дејствуваме како независни пратеници. Согласно деловничките одредби, таквиот статус дава поголеми можности за реплики, процедурални забелешки, односно подобра промоција и видливост на нашите зелени вредности и приоритети. Затоа и во минатиот мандат дејствувавме на тој начин. Нашето дејствување како независни пратеници воопшто не е поврзано со актуелните теми во јавноста, за стабилноста на мнозинството и Владата. Остануваме дел од коалицијата “Можеме”, парламентарното мнозинство и Владата“, одговори Морачанин.
ФЛЕШ ВЕСТИ:
Општество– Во село Виничани, општина Градско се наоѓа стара џамија изградена пред 4 века, која е во целосно распаѓање, бидејќи никој не се грижи за тој објект. Со помош на донација, од ИВЗ беше поставена ограда околу објектот која во вечерните часови непознати лица ја искршиле оградата, што предизвика гнев и револт кај муслиманското население.
Застрелан е полициски службеник во општина Ѓорче Петров, син на на поранешниот поглавар на ИВЗ, Сулејман Реџепи.
Политика– Во Кривичниот суд Скопје продолжи судењето за „Организаторите на 27 април”, обвинетите се товарат дека сториле кривично дело „терористичко загрозување на уставниот поредок и безбедноста“.
По скоро еден месец во Собранието на Република Северна Македонија се одржуваат продолженија на 21, 22, 25 и 26 седница,
Во Шуто Оризари денеска е отворена народна кујна која ќе обезбедува храна и оброци за 320 до 380 граѓани во социјален ризик од Општината.
Ковид-19– Во земјава се вакцинирани над 2600 здравствени работници со вакцини од производителот „Фајзер“ кои државава го доби како донација од Србија.
Во тек е и втора постапка за набавка на уште 200 илјади дози од кинеската вакцина, а формализирани се и документите за набавка на руската вакцина „Спутник“.
Образование– Средношколците избраа осум наставници и претставник на матурантите во работната група за подготовка на скратени испитни програми за изучување за време на ковид кризата.
Лажни вести– Државниот завод за статистика соопшти дека неточни се вестите за пробивање на апликацијата за попишување.
СЛОБОДНА ЗОНА
„Се шират гласини, колку се точни не знаеме, слушаме и читаме дека помалите политички партии ќе се делат од коалициски партнери и ќе трчаат сами на локалните избори, нормално, пак да се покажат дека можат, а според сите резултати од повеќе изборни циклуси во Република Северна Македонија е докажано дека не можат да го поминат ниту “прагот”“ пишува Сафет Зеќири во колумната „Кога малите политички партии сакаат да се покажат“.
„ За Македонците во Бугарија, еве, нема да зборувам, иако има многу што да се каже. Но верувам дека и Турција во еден момент ќе каже „збор-два“ за мрачната „операција“ на Тодор Живков за асимилирање на Турците кон крајот на 80-те години од минатиот век, кога повеќе од 350.000 Турци заминаа од Бугарија. Тоа беше време на жестоко кршење на човековите права и човечки жртви во Бугарија. Бугарија вели дека македонската страна не го исполнува договорот. Напротив, целиот свет виде, но и гласно проговори за тоа кој, всушност, го крши договорот за пријателство и тоа на најгруб можен начин – со кршење на правото на самоопределба. Договорот говори за заедничка историја, а сега, тоа што е заедничко може да биде само бугарско. Каде е логиката? Но, национализмот никогаш и не се потпирал на логиката, така што нема ни да ја бараме.“ пишува Џабир Дерала во колумната „Македонско-бугарски односи: Битка меѓу разумот и популизмот“
И. Крџиќ