ВЕСТ НА ДЕНОТ: Формирана парламентарна група за правата на лицата со хендикеп
Почитување и унапредување на правата на лицата со хендикеп и отстранување на сите бариери со цел да се овозможи нивно вклучување во општествениот и политичкиот живот, подигнување на јавната свест за ова прашање, иницирање законски решенија кои тоа ќе го овозможат, се дел од прашањата на кои ќе работи Интерпартиската парламентарна група (ИППГ) што беше формирана денеска во рамки на овој пратенички состав на Собранието.
Претседателот на Собранието Талат Џафери обраќајќи се на состанокот за формирање на оваа ИППГ, истакна дека сите законски решенија кои ќе се носат треба да им го олеснуваат животот на овие лица, да овозможат еднаков третман, пристап и можности за секој граѓанин, без оглед на неговата етничка, верска, полова, социјална и културолошка припадност, а секако, во ниту еден случај во зависност од неговата физичка можност или неможност.
– Верувам дека најтешко надминливите бариери се токму тие што ги подигаме во нашата свест, со нашиот начин на размислување и начин на делување. Наша законска, морална и етичка должност е да работиме во насока на симнување на тие бариери, да се посветиме на унапредувањето и заштитата на човековите права и оневозможување на дискриминација по каков било основ и тоа треба да ни биде водилка при секој преземен чекор за менување, дополнување, прилагодување на важечките закони во нашата земја, рече Џафери.
ЦИВИЛНИ АКТИВНОСТИ
Втори февруари – уште еден изговор за ширење говор на омраза
Втори февруари, како датум кој се поврзува со хомосексуалците, е всушност хомофобичен и измислен датум. Интернационален ден на гордоста е на 27-ми јуни, сепак за многумина 02.02. отсекогаш важел за ден на хомосексуалците, но и повод за разни закачки, досетки, но пред се говор на омраза кон ЛГБТИ+ лицата.
Имено, 2 февруари како празник на хомосексуалците е познат само кај нас и во блиското соседство, додека 17 Мај се одбележува секоја година како Меѓународен ден на борба против хомофобијата и трансфобијата (МДБХТ).
2 февруари – Ден на свеќите, водните живеалишта, укулеле…
Кај нас и соседите 2 февруари можеби се „одбележува“ како ден на хомосексуалците, меѓутоа на денешен ден во светот се одбележуваат и Светски ден на свеќите, водните живеалишта, укулеле…
ФЛЕШ ВЕСТИ
Министерството за правда, по прибирањето на сите потребни документи, во предвидениот рок ќе достави до бугарските власти барање за екстрадиција на лицето Игор Спасов назад во земјава, велат од министерството за ЦИВИЛ Медиа.
ВМРО-ДПМНЕ не се откажува од собирањето потписи за поништување на донесениот Закон за попис. Вчера на седница на Извршниот комитет била донесена одлука утре да почне Иницијативата за собирање потписи.
Основниот кривичен суд Скопје во 2020 година го надминал приливот на предмети и го намалил заостатокот на нерешени предмети што е показател на ажурноста на судот, рече претседателот на судот Иван Џолев на денешниот брифинг со претставниците на медиумите и невладините организации.
„Пописот на населението, домаќинствата и становите кој ќе се спроведе во април 2021 година ќе ги даде сите потребни одговори во однос на обезбедување квалитетни статистички податоци кои се клучни за градење стратегии и политики и за успешен и предвидлив развој на државата“, соопштува владината служба.
Платформата за родова еднаквост организира протестен марш, на кој ќе бидат соопштени барањата до институциите за темелно расчистување на случајот „Јавна соба“ и за сеопфатен пристап во справувањето на државата со родово базираното насилство, кое во разни форми е широко распространето и вкоренето во нашето општество.
Државниот јавен обвинител Љубомир Јовески во интервју за „Дојче веле“ во однос на случајот „Јавна соба“ истакна дека се потребни измени и дополнувања на Кривичниот законик, со најавените кривичните дела „демнење“ и „сексуално вознемирување“, за да се следи современиот развој.
СЛОБОДНА ЗОНА
„ПАНДЕМИЈА НА ДЕЗИНФОРМАЦИИ
Иако завршницата на изборите во САД уште долго ќе биде под опсервација на аналитичарите, едно е јасно. Опсадата на Капитол е последица од рапидно зголемено и неконтролирано ширење на дезинформации и лажни вести. Главните лиферанти на дезинформациите беа Трамп и луѓето непосредно околу него. Избран е моментот на рекордно ниска доверба на Американците во сопствените политички институции.
Поради ваквата недоверба во институциите, републиканските бирачи беа повеќе склони да му веруваат на Трамп и кујната која лиферува лажни вести за изборна измама, отколку да проверуваат во веродостојноста на понудените професионално подготвени вести, за што дополнителен аргумент се и одбиените жалби за изборна измама од страна на судските власти. Гледајќи од нивниот агол, физичката окупација на Капитол од страна на демонстрантите е „револуционерно“ преземање на власта во рацете на „народот“. Тоа беше всушност и ветувањето на Трамп во неговиот говор за време на инаугурацијата, кога на присутните им порача дека со стапување на должност претседател на САД овој пат не се врши трансфер на власт од една на друга администрација ниту од една на друга партија, туку се пренесува директно на народот“, пишува Александар Н. Писаров во (ДОСИЕ) Изборите во САД: Сенка врз американска демократија (3).
