ВЕСТ НА ДЕНОТ: Втор ден собраниска расправа за Законот за попис
Пратениците во Парламентот денеска ја продолжија расправата по Законот за попис, при што и оние од владејачките мнозинство и од опозицијата останаа на ставовите што ги најавија нивните матични партии. Пратениците од ВМРО-ДПМНЕ повторно изнесуваа ставови зошто треба да се повлече Законот и да се одложи пописот, додека оние од СДСМ и другите владејачки партии останаа на тврдењата дека нема да има злоупотреби и дека попис ќе има.
И додека владејачкото мнозинство се држи за ставот дека методологијата е подзаконски акт кој произлегува од законот, а попишувањето ќе го реализира Државниот завод за статистика, опозицијата уште еднаш побара повлекување на предложениот текст, без тоа да се сфати како пораз, туку, како што беше речено, како начин за изнаоѓање најдобро решение.
Ова е втор ден од расправата која почна вчера, а Предлог-законот во Собранието го образложи заменик министерот за правда, Агим Нухиу.
ИЗЈАВА НА ДЕНОТ: Царовска ја демантира дезинформацијата на Котеска: Ниту се планирало, ниту ќе се укинува групата на македонски јазик на Филолошки факултет
„Најостро ги демантирам тврдењата на Јасна Котеска – повикувам да запре ширењето дезинформации! Ниту се планирало, ниту ќе се укинува групата македонски јазик на Филолошкиот факултет. Ова е чиста лага, граѓаните да не подлегнуваат на овие шпекулации“, демантира министерката за образование и наука Мила Царовска преку својот Твитер профил, откако претходно професорката Јасна Котеска наведува наводен „таен државен удар“ односно укинување на групата на македонски јазик на Филолошки факултет.
ЦИВИЛНИ АКТИВНОСТИ
Анкета: Пописот мора да се одржи, оти без броење нема да знаеш колку кокошки имаш во дворот
Попис – политичка или статистичка операција?
Во контекст на продолжението на собраниската седница каде ќе се расправа за предлог законот за пописот на населението, домаќинствата и становите во Република Северна Македонија, по скратена постапка, кое најверојатно ќе започне, а можеби и заврши, со опструкции од опозицијата, се наметнува прашањето од јавен интерес дали се работи за статистичка или политичка операција. Или можеби, статистичко-политичко пребројување на населението.
На вчерашната расправа се побара повлекување на предлог-законот со образложение дека владејачкото мнозинство треба најпрвин владејачкото мнозинство да организира внатрепартиска и внатре државна дебата со цел да се најде консензуално решение како да се спроведе оваа статистичка операција. Во спротивно тие ќе се преземе иницијатива за негово поништување.
ФЛЕШ ВЕСТИ
Министерот за надворешни работи Бујар Османи во рамките на официјалната посета на Грција се сретна со претседателката Катерина Сакеларопулу, премиерот Кирјакос Мицотакис и со алтернативниот министер за европски прашања, Милтијадис Варвициотис.
„Реформите во основното образование требало да се направат уште пред една деценија и со носењето на новата концепција не се брза, туку напротив веќе доцниме“, велат од Министерството за образование и наука.
Во изминатите 24 часа во ковид-центрите во болниците низ земјава надвор од Скопје е пријавено дека се лекуваат вкупно 412 пациенти позитивни и суспектни на коронавирусот соопшти Министерството за здравство.
Министерот за здравство Венко Филипче денеска изјави дека од 21 месецов ќе се врати работното време на угостителските објекти до 21 часот, а сите останати мерки остануваат во сила.
СЛОБОДНА ЗОНА
„Во Македонија секое дно е дупло: каква е таа ниска политичка страст да се злоупотребува и Вевчанскиот карневал за ситни политички поени, за некој локален партиски празноглавец да може да се слика дека „храбро“ дошол во „судир“ со „режимската полиција“… За потоа сите партиски ботови да те шеруваат, курирците да хистеризираат, а Хер Флик инстантно да започне глумажа со голема загриженост за демократијата и слободите под бруталните притисоци на „режимот“!“, пишува Сашо Орданоски во колумната „Тргнете ги партиските валкани прстиња од Вевчанскиот карневал!“.
„Вчера тутунарите беа на состанок во Владата со министерот за земјоделство, шумарство и водостопанство и откупувачите во обид да ги решат проблемите со откупот на тутунот. .Јавноста во последните 30 години со исклучок на неколку години, во месеците кога се врши откуп на тутунот е сведок на мачни слики од разни состаноци, координации, протести, манипулации за остварување партиски агенди врз грбот на тутунарите, грди слики од откупните пунктови и разни слични настани кои оставаат мачен впечаток за талкањето на тутунопроизводителите во остварување на нивните права да ја добијат заслужената награда за вложениот труд. Тутунарите по правило се незадоволни од цената, државата е незадоволна од улогата на регулатор, координатор и судија во спорот, а откупувачите никогаш не се задоволни од ,,квалитетот на тутунот” и условите кои треба да ги исполнат за да добијат овластување за откуп и уценување“, пишува Перо Наумовски во колумната „Субвенциите во аграрот, економска или социјална мерка?“.
