ВЕСТ НА ДЕНОТ
ВМРО-ДПМНЕ побараа, па избегаа од дебатата за интерпелацијата на Спасовски што ја побараа самите
Пратеничката група на ВМРО-ДПМНЕ ја напушти седницата на која се расправа за интерпелацијата за министерот за внатрешни работи Оливер Спасовски. Пратениците од опозициската партија не можеа да се обратат бидејќи не беа ставени на листата на говорници, поради тоа што, како што беше објаснето од претседателот на Собранието Талат Џафери, тие својата листа ја доставиле до него со неколку часа задоцнување, а денеска нивен претставник не присуствувал на координација за да се договорат.
Никола Мицевски, координаторот на пратеничката група на ВМРО-ДПМНЕ истакна дека листата била доставена со задоцнување бидејќи тие доставувале кривична пријава за Џафери за 36. седница, на која присуствуваа пратеници со скафандери заразени со Ковид-19. Обвини дека досега не се случило интерпелација за министер од власта да помине без пратеници од опозицијата.
ИЗЈАВА НА ДЕНОТ
„Вакцинацијата се одвива добро. Во салата „Борис Трајковски“ се врши ревакцинација по три недели од вакцинацијата со вакцината „Спутник В“. Тоа се тие 20.000 дози. Во саботата доцна навечер, практично в неделата наутро стигна нова количина од 20.000 вакцини „Спутник“ од кои 7000 ќе бидат наменети за ревакцинација на вработените во критичната инфраструктура… Треба да стигне и одредена количина преку системот на солидарност од ЕУ преку Австрија. Сето тоа влегува во нашиот распоред како ќе се распределуваат вакцините. Има неколку пункта во државата, освен во Скопје, каде има фрижидери за вакцината на „Фајзер“ и тие се распределуваат и кон околните центри на тој начин што здравствените домови согласно бројот на закажани граѓани секое утро подигнуваат одредена количина од вакциналните пунктови во Куманово, Штип, Битола, Охрид, Тетово и во Кавадарци и така се прави распоредот и регионално“, изјави денеска министерот за здравство Венко Филипче.
ФЛЕШ ВЕСТИ
КОВИД-19 Постојните мерки за ограничување на движењето и другите рестрикции и мерки за примена на личната заштита за спречување на ширењето на КОВИД-19 истекуваат утре, а се очекува денеска Комисијата за заразни болести да ја анализира епидемиолошката состојба по што ќе биде одлучено дали ќе има нови мерки за време на претстојните велигденски празници. Комисијата за заразни болести на денешниот состанок предложи полицискиот час од 28 април да почнува од 21 часот и да трае до 5 часот изутрината.
ЗДРАВЈЕ Под мотото „Вакцините нè доближуваат” денеска почнува одбележувањето на Европската недела на имунизација.
ПРАЗНИЦИ За претстојните верски празници, Велигден и Рамазан Бајрам, сабота кон недела и 12 кон 13 мај, нема да има полициски час и граѓаните ќе можат слободно да се движат, со почитување на мерките за заштита-носење маска и држење дистанца.
ВАКЦИНАЦИЈА Стигнаа вакцини „Спутник V“, денеска ќе стигнат 10.000 од „Фајзер“, а на крај на месецов 200.000 кинески вакцини. Лицата со ретки болести ќе се вакцинираат од следната голема количина на вакцини.
ОПШТЕСТВО Министерката за одбрана Радмила Шекеринска заедно со амбасадорката на САД, Кејт Брнз, денеска, во армискиот полигон „Криволак“ги посетија припадниците на Армијата на Република Северна Македонија и на вооружените сили на САД, кои заеднички работат на изградба на нови содржини на полигонот, пред почетокот на меѓународната вежба, „Одлучен удар 21“.
АРМИЈА Шекеринска очекува широка поддршка за Законот за отпремнина за професионалните војници.
ТЕХНОЛОГИИ Со дигитализацијата на судството постапките ќе бидат побрзи и поевтини, а одложувањата значително намалени
ОБРАЗОВАНИЕ Дигиталниот учебник нема да биде единствена опција за учениците, ќе се применува комбиниран модел
ПОЛИТИКА Доколку не се донесе седми пакет мерки, околу 10.000 лица од текстилниот сектор ќе останат на улица.
СРЕДБА Пред утрешната седница на Влада, премиерот Зоран Заев ќе се сретне со инспекторите од Државниот пазарен инспекторат
ЗЕЛЕНИ Здружението Еко-Герила од Тетово упати писмо до претседателот Стево Пендаровски алармирајќи на честите прекини со водоснабдувањето во градот, кој трае два месеци а нема решение од локалната власт.
ПРАВДА Основното јавно обвинителство Скопје поднесе Обвинителен акт против креаторот и администраторот на групата „Јавна соба“ кои се товарат за кривично дело – Производство и дистрибуција на детска порнографија.
МВР соопштува дека се приведени две лица поради напад на полициски службеници на вчерашниот протест.
ОЈО Скопје ги отфрли кривичните пријави на ВМРО-ДПМНЕ за оддавање на класифицирани информации
ЕКОНОМИЈА Министерство за финансии и УНДП потпишаа Меморандум за унапредување на фискалната децентрализација.
Денарот претставува еден од клучните столбови на стабилноста на македонската економија, порачува гувернерката на Народната банка, Анита Ангеловска-Бежоска по повод 29-годишнината од монетарното осамостојување.
ЦИВИЛНИ АКТИВНОСТИ
ЦИВИЛ денеска продолжи со видео продукција на пораки од познати личности, како дел од Иницијативата „Направи разлика: Почитувај ги различностите“. Тимот на ЦИВИЛ денеска беше на сет со Атиџе Муратова, во пријатна и продуктивна атмосфера во центарот на Скопје.
СЛОБОДНА ЗОНА
„Тоа е истата агресивна, нетолерантна, ревизионистичка, анахрона, опасна, недемократска политичка реторика и отровна партиска енергија што беше главното погонско „гориво“ во обидот за насилно, токму терористичко, рушење на легалната и легитимно избрана влада во 2017 година. Тие не мрднале ни една јота, ниту со паметот ниту со идеологијата, од времето на губењето на власта во врска со тоа каде сакаат да биде државата денес: меѓународно изолирана, демократски згазена, заробена во своето минато, со многу национализам и уплашено граѓанство, со правен систем диригиран од Белата палата и од поапсената или разбегана врхушка на власт“, пишува Сашо Орданоски во колумната Фала на прашање, за тоа се боревме!
„Присуство на Русија во западен Балкан е неминовно и не постои сценарио според кое Русија би се повлекла од овој регион.
Русија ќе ги искористи сите хибридни начини што посилно да влијае во земјите на Западен Балкан, да го засили своето присуство и ако успее, да инсталира свои испостави во виталните области. Северна Македонија, по зачленувањето во НАТО, е под посебна опсервација на руските разузнавачки служби, бидејќи руската дипломатија, уште пред да се завиори македонското знаме пред седиштето на НАТО, изјави дека доколку тоа се случи, Москва ќе го смета како непријателски чин…
Москва настојува одвнатре да ги ослаби и разбие ЕУ и НАТО и со сите дипломатски и други средства работи на зајакнување на линијата во која кохезиониот фактор за остварување на оваа цел се и допрва ќе бидат конзервативно популистичките кругови во земјите на Западен Балкан и Европска Унија“, пишува Александар Николиќ Писарев во Руската „хибридна“ сенка врз Западен Балкан (1)
„Уште малку, па цела една година власта, актуелната владејачка коалиција, не успева барем во некакви, минимум раат, околности да ги спроведува своите проевропски програмски агенди. При вакви блокади, парламентот проработува само парцијално и тоа сè некако на сила. Или само под притисок на јавноста или само под добронамерна, па сепак присила, на влијателните странските дипломати. Актуелната собраниска работна ефектива се сведува на лотариска премија. Во такви околности, било какви ЕУ реформи практично се невозможна мисија. Македонскиот парламент во овој состав е практично неупотреблив“, вели Зоран Иванов во Чекор назад – два во место
„Сите одиграа, што се вели, на прва. Додека сме на полувреме, пред почетокот на второто полувреме, имам неколку пораки до актерите, Владата и Стојко Пауновски… Премиерот и владата исто така се исправени пред тешка дилема, иако се свесни за проблемите со кои се среќаваат инспекторите на терен во спроведување на законите, превработеноста во администрацијата, партизираноста и квалитетот на услугите на администрацијата. Наталожени се многу проблеми кои сепак ќе мора што поскоро да почнат суштински да се решаваат. Но во едно премиерот е во право, одлуките на владата мора да се спроведуваат од надлежните органи“, пишува Перо Наумовски во Пред почеток на второто полувреме.
Тимот на ЦИВИЛ
