ВЕСТ НА ДЕНОТ: За доверба на Владата гласаа 62 пратеници
Премиерот Зоран Заев попладнево побара од пратенциите да се изјаснат за доверба на Владата. Заев кажа дека според Уставот и собранискиот деловник, односно член 217, да се гласа без расправа. Премиерот има право усно да побара гласање доверба на Владата.
По едночасовна пауза, пратеничките и пратениците гласаа за доверба на Владата. Заев ја доби довербата на Владата од сите присутни пратеници, со 62 гласа „за“ без против и воздржани. Пред гласањето, Заев изјави дека целта за барањето доверба беше да се стави крај на сите пропаганди на ВМРО-ДПМНЕ, како и да се види дека никој нема против за самостојно дејствување на помалите партии.
ИЗЈАВА НА ДЕНОТ
Заев: Ова е моментот да провериме, стабилна власт или разнишана опозиција?
„Со оваа моја постапка денеска, еве ме, застанувам пред вас, и во име на целата влада, во име на сите министри и коалициони партнери ја преземам одговорноста и ве повикувам да се изјасните и да гласате за доверба на Владата. Ајде да се соочиме и да расчистиме: Да го видиме на дело тоа толку најавувано наводно мнозинство од опозицијата кое наводно ќе ја паднело оваа Влада. Ова е моментот кога ќе им покажеме на граѓаните колку има вистина во зборовите на опозицијата. Ова е моментот да видиме за што станува збор: стабилна власт или разнишана опозиција? Мора да е едно од двете, ако не и двете заедно“, изјави премиерот Зоран Заев од собраниска говорница, одговарајќи на пратенички прашања.
ФЛЕШ ВЕСТИ
Министерството за здравство ја информира јавноста дека Комисијата за заразни болести ќе предложи задолжителен домашен карантин од 14 дена за лица кои доаѓаат од сите африкански земји.
Апостол Симовски, ДЗС: Во сите пописи досега од ’48 наваму имало код за бугарска етничка припадност
Најновиот извештај на Фридом Хаус констатира напредок со позитивни оценки за реформите. Во извештајот „Слободата во светот“, годинашната оценка за државата е 66 од можни сто поени, што е за три поени напредок од лани.
ВМРО-ДПМНЕ поднесе Предлог закон за поништување на Законот за попис
Усвоен предлог-закон од Владата за прогласување на дел од Шар Планина за заштитено подрачје во категорија II – Национален парк
Државниот завод за статистика објави дополнителен јавен конкурс за ангажирање лица кои ќе учествуваат во спроведувањето на Пописот на населението, домаќинствата и становите во Република Северна Македонија во периодот 1 до 21 април во својство на реонски попишувачи и реонски инструктори.
Владата на синоќешната седница ја усвои Концепцијата за основно образование за чија подготовка како што велат биле вклучени сите засегнати страни, меѓу кои експерти, универзитетски професори, претставници од МАНУ, наставници граѓански и меѓународни организации.
ЦИВИЛНИ АКТИВНОСТИ
Градоначалникот на Штип, Сашко Николов, Претседателката на Совет на општина, Маријана Рогожарска Поповска, Претседателката на пописна комисија, Соња Китанова, Кординаторот на советничката група на ВМРО-ДПМНЕ, Љубе Здравков, Советничката од ВМРО-ДПМНЕ, Христина Серафимовска, Директорот на Дом на млади, Горан Трајков и главниот уредник на ТВ Ирис, Војо Маневски, се седумте учеснички и учесници на панел дискусијата „Попис: Статистика, не политика“ во Штип, утре, 4 март, со почеток во 16 часот. Настанот го организира ЦИВИЛ, а модератор ќе биде Џабир Дерала.
СЛОБОДНА ЗОНА
„Во извештајот „Слободата во светот“ на Фридом хаус, во 2016-17 година имавме 57-58 индексни поени. Оваа година, скорот на Северна Македонија стигна до 66 индексни поени. “Неодамна реизбраната владата на премиерот Зоран Заев направи пресврт по годините на демократско назадување, но на земјата продолжува да и се негира шансата да се приклучи во ЕУ“, се вели во извештајот… Сепак, многу е битно дека и угледни меѓународни организации констатираат дека, после цела деценија паѓање, нашата демократија веќе 3-4 години напредува и станува сè послободна. За тоа треба да се честита, на луѓето во институциите, во правосудството, медиумите, во граѓанскиот сектор, во академијата, и на сите чинители во јавноста и секако на граѓаните – кои придонесуваат за тој напредок“, вели Петрит Сарачини во „За Фридом хаус 3 години по ред имаме напредок после долги години пад, кому да се честита, а кому да се изрази сочувство?“
„Не би можел да погодам колку Бугари живеат во Македонија, бидејќи тоа, за мојата повоена генерација, никогаш не била никаква значајна тема во македонската општествена и политичка реалност. Но, колку и да се – бугарските политичари им прават ужасно лоша услуга. Вакво политичко злоупотребување на некоја група на граѓани во соседна земја за најординарни предизборни валкани цели, како ова во трката за власт во Бугарија, никому нема ништо добро да му донесе, а најмалку на нашите сограѓани, овдешните Бугари. Бидејќи, овој низ од провокации на кои сме изложени со месеци наназад од Софија на оваа тема, на крајот, ќе создаде вистински одиум и реални непријатности за оние кои имаат бугарски чувства во земјава“, пишува Сашо Орданоски во „Се моли Софија да не им отежнува на овдешните Бугари“
